جیکب آباد (پاک ٹوڈے): پاکستان تحریکِ انصاف (پی ٹی آئی) سندھ کی جانب سے ضلع جیکب آباد کے شہر ٹھل میں ایک شاندار "پاکستان زندہ باد، عمران خان پائندہ باد” ریلی کا انعقاد کیا گیا، جس میں کارکنان اور شہریوں کی بڑی تعداد نے شرکت کی۔
ریلی کی قیادت پی ٹی آئی سندھ کے سینئر نائب صدر سردار مولا بخش سومرو نے کی۔ مظاہرین اور پارٹی کارکنان نے ہاتھوں میں قومی اور پارٹی پرچم اٹھا رکھے تھے اور ملک و قیادت کے حق میں نعرے بازی اور اپنے قید رہنما عمران خان کی رہائی کا مطالبہ کر رہے تھے۔
اس موقع پر خطاب کرتے ہوئے رہنماؤں کا کہنا تھا کہ عوام کا جذبہ اور شاندار شرکت اس بات کا ثبوت ہے کہ عوام اپنی قیادت کے ساتھ مکمل یکجہتی کے ساتھ کھڑے ہیں۔ ریلی اپنے طے شدہ راستوں سے ہوتی ہوئی اپنے نقطہ اختتام پر پہنچ کر پرامن طور پر اختتام پذیر ہوئی۔