اسلام الدین ساجد
اسلام آباد (پاک ٹوڈے)۔ پاکستان میں نئے صوبوں کے قیام کے معاملے پر سیاسی کشیدگی کے درمیان معروف صحافی اور جیو نیوز کے اینکر شہزاد اقبال نے دعویٰ کیا ہے کہ ریاست اور حکومت نے پاکستان پیپلز پارٹی کے چیئرمین بلاول بھٹو زرداری کی مخالفت کے باوجود ملک بھر میں ریفرنڈم کرانے کا فیصلہ کر لیا ہے، جس کے ذریعے عوام سے نئے صوبوں کے قیام کے بارے میں براہ راست رائے لی جائے گی۔
شہزاد اقبال نے اپنے پروگرام میں نام ظاہر کیے بغیر باخبر ریاستی ذرائع کے حوالے سے بتایا کہ ریفرنڈم ہر صورت منعقد ہوگا اور اس کا ابتدائی خاکہ بھی تیار کر لیا گیا ہے۔ ان کے مطابق ریفرنڈم پورے پاکستان میں ہوگا، تاہم ووٹوں کی گنتی اور نتائج صوبائی سطح پر الگ الگ مرتب کیے جائیں گے تاکہ معلوم ہو سکے کہ کس صوبے کے عوام نئے صوبوں کے قیام کے حق میں ہیں۔
یہ پیش رفت ایسے وقت میں سامنے آئی ہے جب بلاول بھٹو زرداری نے اپنی حالیہ تقریر میں نئے صوبوں کے قیام اور ریفرنڈم کے معاملے پر سخت مؤقف اختیار کرتے ہوئے حکومت اور ریاستی اداروں کو تنقید کا نشانہ بنایا تھا۔ ان کے بیانات کے بعد سیاسی حلقوں اور میڈیا میں نئے صوبوں کے قیام کے معاملے پر بحث تیز ہو گئی ہے۔
اس سے قبل اے آر وائی نیوز نے رپورٹ کیا تھا کہ صدر آصف علی زرداری کی زیر صدارت ایوان صدر میں پیپلز پارٹی کی اعلیٰ قیادت کے اجلاس میں بلاول بھٹو زرداری اور ان کے والد کے درمیان اس بات پر اتفاق ہوا کہ پارٹی نئے صوبوں اور ریفرنڈم سے متعلق اپنے مؤقف سے پیچھے نہیں ہٹے گی۔
تاہم شہزاد اقبال کے مطابق ریاستی ذرائع کا کہنا ہے کہ بلاول بھٹو کی حالیہ پریس کانفرنس نے اس عمل کو روکنے کے بجائے مزید تیز کر دیا ہے۔
نئے صوبے لسانی نہیں، انتظامی بنیادوں پر ہوں گے
شہزاد اقبال کے مطابق باخبر ذرائع نے واضح کیا ہے کہ مجوزہ نئے صوبے لسانی بنیادوں پر نہیں بلکہ انتظامی بنیادوں پر قائم کیے جائیں گے۔
یہ محض انتظامی یونٹس یا مقامی حکومتوں کے نظام کی توسیع نہیں ہوگی بلکہ مکمل آئینی صوبے بنانے کی تجویز ہے، جن کی اپنی صوبائی اسمبلیاں، وزرائے اعلیٰ اور کابینہ ہوگی۔
ذرائع کے مطابق ہر نئے صوبے کا وزیراعلیٰ اس کا چیف ایگزیکٹو ہوگا، جبکہ کسی میئر یا ایڈمنسٹریٹر کو صوبائی حکومت کے اختیارات دینے کی تجویز زیر غور نہیں۔
ریاستی ذرائع کا کہنا ہے کہ نئے صوبوں کا مطالبہ ملک کے چاروں صوبوں میں موجود ہے اور اگر کسی صوبے کے عوام ریفرنڈم میں نئے صوبوں کے قیام کی حمایت کرتے ہیں تو ان کی رائے کو سیاسی اور اخلاقی اعتبار سے مضبوط مینڈیٹ حاصل ہوگا۔
اس صورت میں منتخب نمائندوں کے لیے عوامی فیصلے کو نظرانداز کرنا مشکل ہوگا۔ اگر عوام نئے صوبوں کے حق میں ووٹ دیتے ہیں، لیکن ان کے منتخب نمائندے اس کے برعکس مؤقف اختیار کرتے ہیں تو اس سے اہم آئینی اور قانونی سوالات جنم لے سکتے ہیں۔
پہلے ریفرنڈم، صوبوں کی تعداد کا فیصلہ بعد میں ہوگا
شہزاد اقبال کے مطابق ذرائع نے بتایا ہے کہ نئے صوبوں کی تعداد کے بارے میں ابھی کوئی حتمی فیصلہ نہیں کیا گیا۔ پاکستان میں 12 یا 14 صوبے بنانے سے متعلق باتیں قبل از وقت ہیں۔
پہلا مرحلہ ریفرنڈم کے ذریعے عوام کی خواہشات معلوم کرنا ہوگا۔ اس کے نتائج سے یہ بھی سامنے آئے گا کہ موجودہ صوبوں کے اندر کون سے شہر اور اضلاع الگ صوبائی انتظام چاہتے ہیں۔
ذرائع کے مطابق اس معاملے پر گزشتہ تین ماہ سے مشاورت اور بحث جاری ہے اور اب غیر یقینی صورت حال برقرار رکھنے کے بجائے واضح فیصلہ سامنے لانے کی ضرورت محسوس کی جا رہی ہے۔
شہزاد اقبال نے بتایا کہ جب انہوں نے ذرائع سے سوال کیا کہ بلاول بھٹو تو ریفرنڈم کی مخالفت کر رہے ہیں تو انہیں جواب دیا گیا کہ بلاول کی پریس کانفرنس کے بعد اس عمل میں مزید تیزی آئی ہے۔
کیا سندھ میں تصادم یا خونریزی کا خدشہ ہے؟
نئے صوبوں کے قیام کی بحث میں سندھ، خصوصاً کراچی کی سیاسی صورت حال بھی اہمیت اختیار کر گئی ہے، جہاں ماضی میں صوبے کی تقسیم کے مطالبات پر شدید سیاسی اختلافات سامنے آتے رہے ہیں۔
شہزاد اقبال کے مطابق جب ریاستی ذرائع سے پوچھا گیا کہ ریفرنڈم سے سندھ میں سیاسی تنازع یا تصادم کی صورت حال پیدا ہو سکتی ہے تو انہوں نے ایسے خدشات کو بے بنیاد قرار دیا۔
ذرائع کا کہنا تھا کہ عوامی سطح پر کسی بڑے تصادم کے آثار نہیں اور نئے صوبوں کے قیام سے سیاسی جماعتوں کا کردار کمزور نہیں ہوگا۔
اسی طرح ان ذرائع نے خیبر پختونخوا اور بلوچستان میں امن و امان کی صورت حال کو بھی ریفرنڈم کی راہ میں رکاوٹ بننے کے امکان کو مسترد کیا۔
کراچی اور گوادر کو وفاق کا حصہ بنانے کی تجویز؟ شہزاد اقبال کے مطابق ریاستی ذرائع نے اس بات کی بھی تردید کی کہ نئے صوبوں کی بحث دراصل پاکستان میں صدارتی نظام متعارف کرانے کی کسی منصوبہ بندی کا حصہ ہے۔
ذرائع نے واضح کیا کہ صدارتی نظام لانے کا کوئی منصوبہ زیر غور نہیں۔
تاہم جب ان سے پوچھا گیا کہ کیا کراچی اور گوادر کو وفاقی علاقے بنانے کی کوئی تجویز موجود ہے تو جواب دیا گیا کہ فی الحال ترجیح ریفرنڈم ہے، لیکن مستقبل میں اگر عوام اس کی حمایت کریں تو کراچی اور گوادر کو وفاق کا حصہ بنانے کے امکان کو مسترد نہیں کیا جا سکتا۔
وفاقی وزیر طارق فضل چوہدری نے بھی ایک ٹی وی پروگرام میں کہا تھا کہ اگر اسلام آباد کو صوبے کا درجہ دیا جاتا ہے تو کراچی اور گوادر کو وفاق کے زیر انتظام علاقوں میں شامل کرنے کی تجویز پر بھی غور کیا جا سکتا ہے۔
پنجاب میں بھی نئے سیاسی سیٹ اپ کی سرگرمیاں تیز؟
دوسری جانب اے آر وائی نیوز کے سینئر صحافی نعیم اشرف بٹ نے دعویٰ کیا ہے کہ پنجاب میں بھی نئے سیاسی انتظامات اور ممکنہ تبدیلیوں کے حوالے سے سرگرمیاں شروع ہو چکی ہیں۔
ان کے مطابق وزیراعلیٰ پنجاب مریم نواز کی جانب سے اچانک مسلم لیگ (ن) کے ارکان صوبائی اسمبلی سے ملاقاتوں کا سلسلہ شروع کرنا ایک غیر معمولی سیاسی پیش رفت ہے۔
نعیم اشرف بٹ نے بتایا کہ وفاقی وزیر چوہدری سالک حسین کے ایک انٹرویو کے بعد سیاسی ردعمل سامنے آیا، جس کے نتیجے میں وفاقی وزیر خواجہ آصف اور مریم نواز کی جانب سے آئندہ سیاسی انتظامات سے متعلق بیانات دیے گئے۔
ان کے مطابق گزشتہ چند روز کے دوران مسلم لیگ (ن) کے تقریباً 100 ارکان قومی اسمبلی اور بعض ارکان صوبائی اسمبلی نے اہم ملاقاتیں کی ہیں۔ ان میں سے متعدد ملاقاتیں لاہور میں ضلع اور ڈویژن کی بنیاد پر ہوئیں۔
نعیم اشرف بٹ کے مطابق ان ملاقاتوں میں مستقبل کے سیاسی سیٹ اپ اور آئندہ انتظامات سے متعلق گفتگو ہوئی۔
مریم نواز نے بھی اپنے ایک بیان میں کہا تھا کہ انہیں معلوم ہے کہ کون کہاں ملاقات کر رہا ہے، جسے پنجاب کی سیاست میں جاری سرگرمیوں کے تناظر میں اہم قرار دیا جا رہا ہے۔
حکومت کی پیپلز پارٹی کو منانے کی کوشش، لیکن ریفرنڈم پر اصرار
ادھر وفاقی وزیر طارق فضل چوہدری نے کہا ہے کہ صدر آصف علی زرداری اور وزیراعظم شہباز شریف کی ملاقات کے بعد پیپلز پارٹی اور حکومت کے درمیان سیاسی ماحول میں کچھ بہتری آئی ہے۔
ان کے مطابق حکومت چاہتی ہے کہ پیپلز پارٹی کو تمام معاملات پر اعتماد میں لیا جائے اور نئے صوبوں سمیت اہم قومی امور پر اتفاق رائے پیدا کیا جائے۔
تاہم انہوں نے واضح کیا کہ اگر پیپلز پارٹی اس معاملے پر متفق نہیں ہوتی تو بھی حکومت ریفرنڈم کرانے اور نئے صوبوں کے قیام سے متعلق پیش رفت جاری رکھے گی۔
پاکستان کے وفاقی ڈھانچے میں بڑی تبدیلی کا امکان
اگر شہزاد اقبال کے بیان کردہ منصوبے پر عمل درآمد ہوتا ہے تو یہ پاکستان کے قیام کے بعد اس کے وفاقی اور صوبائی انتظامی ڈھانچے میں بڑی تبدیلیوں میں سے ایک ہوگی۔
اس وقت پاکستان چار صوبوں، اسلام آباد کیپیٹل ٹیریٹری اور دیگر وفاقی انتظامی علاقوں پر مشتمل ہے۔ نئے صوبوں کے قیام سے نہ صرف صوبائی سیاست بلکہ قومی اسمبلی اور سینیٹ میں نمائندگی، وسائل کی تقسیم اور وفاقی اختیارات کے توازن پر بھی اثرات مرتب ہو سکتے ہیں۔
تاہم ریفرنڈم کے انعقاد، اس کے قانونی طریقہ کار، سوالات کی نوعیت اور نتائج کی آئینی حیثیت کے بارے میں ابھی تک حکومت کی جانب سے کوئی باضابطہ تفصیلی اعلان سامنے نہیں آیا۔
اس لیے یہ معاملہ آنے والے دنوں میں حکومت، پیپلز پارٹی اور دیگر سیاسی جماعتوں کے درمیان ایک بڑے سیاسی اور آئینی تنازع کی شکل اختیار کر سکتا ہے۔
