اسلام آباد (پاک ٹوڈے): ملک بھر کے بجلی صارفین پر دسمبر میں ماہانہ اور سہ ماہی ایڈجسٹمنٹس کی مد میں بھاری اضافی بوجھ منتقل کیے جانے کا خدشہ ظاہر کیا جا رہا ہے، جس کے تحت بجلی کی قیمت میں مجموعی طور پر 4 روپے 22 پیسے فی یونٹ تک اضافے کا تخمینہ لگایا گیا ہے۔
وزیراعظم شہباز شریف کی زیر صدارت دسمبر میں بجلی کی قیمتوں سے متعلق اہم اجلاس ہوا، جس میں وزیراعظم کو بجلی کی قیمتوں اور ممکنہ اضافے کے حوالے سے تفصیلات سے آگاہ کیا گیا۔ ذرائع کے مطابق حکومت کی کوشش ہے کہ بجلی صارفین پر کم سے کم اضافی بوجھ منتقل کیا جائے۔
اس وقت ملک بھر کے بجلی صارفین ماہانہ اور سہ ماہی ایڈجسٹمنٹس کی مد میں 2 روپے 89 پیسے فی یونٹ ادا کر رہے ہیں، تاہم نومبر کے مقابلے میں دسمبر کے دوران اس بوجھ میں مزید ایک روپے 33 پیسے فی یونٹ اضافے کا امکان ہے۔
ذرائع کا کہنا ہے کہ بجلی تقسیم کار کمپنیوں نے جولائی سے ستمبر 2026 کی سہ ماہی ایڈجسٹمنٹ کے تحت نیپرا میں درخواست دائر کی ہے، جس میں آئندہ تین ماہ کے لیے ایک روپے 34 پیسے فی یونٹ اضافے کی منظوری مانگی گئی ہے۔ نیپرا اس درخواست پر سماعت مکمل کر چکا ہے، تاہم حتمی فیصلہ ابھی باقی ہے۔
دوسری جانب اکتوبر 2026 کی ماہانہ ایڈجسٹمنٹ کے لیے سینٹرل پاور پرچیزنگ ایجنسی نے 2 روپے 88 پیسے فی یونٹ اضافے کی درخواست جمع کرائی ہے، جس کا اطلاق آئندہ ماہ ہونے کا امکان ظاہر کیا جا رہا ہے۔
