واشنگٹن (پاک ٹوڈے): امریکی محکمہ خارجہ نے سعودی عرب کو 48 ایف 35 لائٹننگ ٹو جنگی طیارے فروخت کرنے کی ممکنہ منظوری دے دی ہے، جس کی مالیت 24.3 ارب ڈالر بتائی گئی ہے۔
رائٹرز کے مطابق مجوزہ معاہدے میں 48 ایف 35 جنگی طیاروں کے ساتھ ان کے انجن، مواصلاتی آلات، معاون خدمات، تربیتی نظام، اسپیئر پارٹس اور دیگر متعلقہ سامان بھی شامل ہے۔
رپورٹ کے مطابق معاہدے میں 49 انجن شامل کیے گئے ہیں، جن میں 48 طیاروں کے لیے جبکہ ایک اضافی انجن بطور اسپیئر فراہم کیا جائے گا۔
امریکی محکمہ خارجہ کے مطابق مجوزہ فروخت سے سعودی عرب کی دفاعی صلاحیتوں میں اضافہ اور امریکی و سعودی افواج کے درمیان دفاعی تعاون اور باہمی آپریشنل صلاحیت بہتر بنانے میں مدد ملے گی۔
تاہم یہ معاہدہ ابھی حتمی نہیں ہوا۔ رائٹرز کے مطابق سعودی عرب کو ایف 35 طیاروں کی فروخت کے لیے امریکی کانگریس کی منظوری درکار ہوگی۔
سعودی سفارتخانے نے واشنگٹن میں امریکی فیصلے کا خیرمقدم کرتے ہوئے اسے دونوں ممالک کے درمیان دفاعی تعاون مضبوط بنانے کی جانب اہم قدم قرار دیا ہے۔
رائٹرز کے مطابق سعودی عرب طویل عرصے سے ایف 35 طیارے حاصل کرنے میں دلچسپی رکھتا ہے۔ سعودی فضائیہ اس وقت ایف 15، ٹورنیڈو اور یورو فائٹر ٹائفون سمیت مختلف جنگی طیارے استعمال کر رہی ہے۔
ایف 35 اسٹیلتھ ٹیکنالوجی سے لیس جدید کثیرالمقاصد جنگی طیارہ ہے۔ مشرق وسطیٰ میں اس وقت اسرائیل واحد ملک ہے جو ایف 35 طیارے استعمال کر رہا ہے۔