پشاور ( شاہین آفریدی): افغان خواتین کک باکسرز نے ایران کے دارالحکومت تہران میں منعقدہ نیشنل لائٹ کک باکسنگ کوالیفائنگ ٹورنامنٹ میں شاندار کارکردگی کا مظاہرہ کرتے ہوئے مجموعی طور پر 15 میڈلز جیت لیے، جن میں 4 گولڈ، 7 سلور اور 4 برونز میڈلز شامل ہیں۔
یہ ٹورنامنٹ تہران کے معروف شہید رجائی اسپورٹس کمپلیکس میں منعقد ہوا، جس میں ایران سمیت مختلف ٹیموں کے 550 مرد و خواتین ایتھلیٹس نے حصہ لیا۔ سخت مقابلوں کے دوران افغان خواتین کھلاڑیوں نے اپنی مہارت، طاقت اور تکنیک کا بھرپور مظاہرہ کیا۔
افغان خواتین کھلاڑیوں نے امید جوانان اسپورٹس کلب کی نمائندگی کی۔ کلب سے وابستہ کھلاڑیوں نے محدود وسائل اور مختلف مشکلات کے باوجود بہترین کھیل پیش کرتے ہوئے نمایاں کامیابی حاصل کی۔
افغان خواتین گزشتہ چند برسوں کے دوران مختلف شعبوں میں اپنی صلاحیتوں کا مظاہرہ کر رہی ہیں۔ تعلیم، صحافت، ادب، آرٹ، کاروبار اور کھیلوں سمیت مختلف میدانوں میں افغان خواتین کی کامیابیاں سامنے آ رہی ہیں۔ ایران میں کک باکسنگ ٹورنامنٹ کے دوران حاصل کیے گئے 15 میڈلز بھی اسی سلسلے کی ایک اہم کامیابی ہیں۔
کھیلوں کے حلقوں میں افغان کھلاڑیوں کی اس کارکردگی کو سراہا جا رہا ہے، جبکہ سوشل میڈیا پر بھی ان کی کامیابی پر خوشی کا اظہار کیا گیا ہے۔ افغان شہریوں اور کھیلوں سے وابستہ افراد نے کھلاڑیوں کو مبارکباد دیتے ہوئے ان کی محنت اور عزم کو قابلِ تحسین قرار دیا ہے۔
افغان خواتین کک باکسرز کی یہ کامیابی نہ صرف افغان کھیلوں کے لیے ایک اہم اعزاز ہے بلکہ مستقبل میں مزید خواتین کھلاڑیوں کو کھیلوں کے میدان میں آگے بڑھنے کا حوصلہ بھی فراہم کرے گی۔
