کابل (پاک ٹوڈے): افغان وزارتِ خارجہ کے مطابق عبوری حکومت کے قائم مقام وزیرِ خارجہ امیر خان متقی نے ریڈ کراس کی بین الاقوامی کمیٹی (ICRC) کے شعبہ عملیاتی امور کی جنرل ڈائریکٹر یاسمین پرائز داسماز سے اہم ملاقات کی ہے، جس میں مختلف باہمی امور پر تفصیلی تبادلہ خیال کیا گیا۔
وزارتِ خارجہ کے جاری کردہ اعلامیے کے مطابق ملاقات کے دوران افغانستان کی موجودہ انسانی ضروریات، روز بروز بڑھتی ہوئی پناہ گزینوں کی واپسی، صحت کے شعبے میں خدمات، اور گزشتہ جنگ کے بقایا اثرات و ضروریات پر تفصیلی بات چیت کی گئی۔
ملاقات کے دوران آئی سی آر سی کی ڈائریکٹر نے انسانی امداد اور تعاونی منصوبوں کے تسلسل کی اہمیت پر زور دیتے ہوئے کہا کہ افغانستان اب ترقی اور معاشی نمو کے ایک نئے مرحلے میں داخل ہو چکا ہے۔ دونوں فریقین نے مختلف انسانی شعبوں میں باہمی تعاون اور مشترکہ اقدامات کو جاری رکھنے پر اتفاق کیا۔
