اسلام الدین ساجد
اسلام آباد (پاک ٹوڈے) ۔ پاکستان کے دارالحکومت اسلام آباد میں جمعیت علمائے اسلام (ف) کے سربراہ مولانا فضل الرحمٰن کی رہائش گاہ کے باہر انسدادِ دہشت گردی اسکواڈ کے اہلکاروں نے ناکہ بندی کردی ہے، جس کے بعد جماعت نے حکومت کے اس اقدام پر شدید تشویش کا اظہار کیا ہے۔
جے یو آئی کے رہنماؤں کے مطابق مولانا فضل الرحمٰن کی رہائش گاہ کے باہر پولیس اہلکار تعینات ہیں، جو وہاں آنے اور جانے والے افراد کی شناخت کررہے ہیں اور ان سے پوچھ گچھ بھی کی جارہی ہے۔
اس صورت حال کے بعد جے یو آئی کے کارکن اور رضاکار بھی مولانا کی رہائش گاہ کے باہر جمع ہونا شروع ہوگئے ہیں۔
پارٹی کے سینئر رہنما اور سپریم کورٹ آف پاکستان کے وکیل سینیٹر کامران مرتضیٰ نے موقع پر پہنچ کر پولیس اہلکاروں سے ناکہ بندی کی وجوہات دریافت کیں، تاہم ان کے بقول اہلکاروں نے کوئی واضح جواب نہیں دیا۔
میڈیا سے گفتگو کرتے ہوئے کامران مرتضیٰ نے کہا کہ انہوں نے متعلقہ اہلکاروں سے تحریری طور پر وضاحت طلب کی ہے کہ کس قانونی اختیار کے تحت مولانا فضل الرحمٰن کی رہائش گاہ کے باہر ناکہ لگایا گیا ہے۔
انہوں نے کہا کہ زبانی وضاحت پر انحصار نہیں کیا جاسکتا کیونکہ کل متعلقہ اہلکار اس سے انکار بھی کرسکتے ہیں۔
سینیٹر کامران مرتضیٰ نے سوال کیا کہ مولانا فضل الرحمٰن ایک بڑی سیاسی جماعت کے سربراہ اور ملک کے معروف سیاستدان ہیں، اگر انہیں کوئی نقصان پہنچتا ہے تو اس کی ذمہ داری کون قبول کرے گا؟
ان کا کہنا تھا کہ اگر حکام کے پاس کوئی قانونی یا انتظامی وجہ موجود ہے تو جے یو آئی کو اس سے آگاہ کیا جائے، لیکن اب تک کسی نے جماعت کو صورتحال کی وضاحت نہیں کی۔
انہوں نے خبردار کیا کہ حکومت کو اس معاملے کی سنجیدگی کا احساس ہونا چاہیے اور حالات کو اس نہج پر نہیں لے جانا چاہیے جہاں معاملات سیاسی قیادت کے کنٹرول سے باہر ہوجائیں۔
کامران مرتضیٰ کے مطابق سوشل میڈیا پر ناکہ بندی کی خبریں سامنے آنے کے بعد کارکن اپنی مرضی سے مولانا کی رہائش گاہ کے باہر جمع ہوئے ہیں۔
سی ڈی اے کے نوٹس اور حکومت کا مؤقف
مولانا فضل الرحمٰن کی رہائش گاہ کے باہر ناکہ بندی ایسے وقت میں کی گئی ہے جب گزشتہ چند ہفتوں سے جے یو آئی اور وفاقی حکومت کے درمیان کشیدگی جاری ہے۔
اکتوبر کے آخر میں کیپیٹل ڈیولپمنٹ اتھارٹی (سی ڈی اے) نے مولانا فضل الرحمٰن کی اسلام آباد میں واقع رہائش گاہ کے مالک کو مبینہ غیر قانونی تعمیرات اور تجاوزات ختم کرنے کے لیے 15 دن کا نوٹس جاری کیا تھا۔
نوٹس میں گھر کے باہر سکیورٹی گارڈز کے لیے بنائے گئے کیبن، سرکاری زمین پر جنریٹر کی تنصیب اور عمارت کے بعض حصوں میں مبینہ خلاف ورزیوں کی نشاندہی کی گئی تھی۔ سی ڈی اے نے خبردار کیا تھا کہ مقررہ مدت میں خلاف ورزیاں دور نہ کرنے کی صورت میں قانونی کارروائی، عمارت سیل کرنے یا غیر قانونی تعمیرات گرانے کے اقدامات کیے جاسکتے ہیں۔
وفاقی وزیر مملکت برائے داخلہ طلال چوہدری نے اس وقت کہا تھا کہ اسلام آباد میں تجاوزات کے خلاف کارروائی گزشتہ ڈیڑھ سال سے جاری ہے اور یہ کسی ایک سیاسی شخصیت کو نشانہ بنانے کے لیے شروع نہیں کی گئی۔
انہوں نے واضح کیا تھا کہ مولانا فضل الرحمٰن کی رہائش گاہ کے حوالے سے جاری کیا گیا نوٹس بھی اسی مہم کا حصہ ہے اور قانون کی خلاف ورزی کرنے والوں کے خلاف بلاامتیاز کارروائی کی جائے گی۔
مفتی ابرار کی رہائش گاہ پر چھاپوں کی اطلاعات
دوسری جانب اسلام آباد میں مولانا فضل الرحمٰن کے قریبی ساتھی مفتی ابرار کی رہائش گاہ پر بھی پولیس کے چھاپے مارنے کی اطلاعات سامنے آئی ہیں۔
مقامی میڈیا رپورٹس کے مطابق اسلام آباد پولیس مفتی ابرار کی گرفتاری کے لیے کارروائیاں کررہی ہے۔ ان کے خلاف انسدادِ دہشت گردی کی عدالت کی جانب سے ناقابل ضمانت وارنٹ گرفتاری جاری ہونے کی بھی اطلاعات ہیں۔
یہ معاملہ اسلام آباد کے سیکٹر آئی نائن میں گزشتہ دنوں جے یو آئی کے ایک اجتماع کے دوران مبینہ طور پر سڑک بند کرنے سے متعلق ہے جس کے بارے میں پولیس نے جے یو ائی کے مقامی رہنماوں پر الزام لگایا تھا کہ انہوں نے پولیس اہلکاروں پر حملے اور سرکاری گاڑیوں کو نقصان پہنچانے کی کوشش کی ہے تاہم جے یو ائی نے ان الزامات کو بے بنیاد قرار دیکر مسترد کردیا ہے ۔
حکومت اور مولانا فضل الرحمٰن کے درمیان سیاسی کشیدگی سیاسی مبصرین کے مطابق مولانا فضل الرحمٰن اور وفاقی حکومت کے درمیان اختلافات میں حالیہ دنوں میں اضافہ ہوا ہے۔ جے یو آئی کے سربراہ حکومت اور ملک کے طاقتور اسٹبلشمینٹ کی بعض پالیسیوں، آئینی معاملات اور سیاسی فیصلوں پر مسلسل تنقید کرتے رہے ہیں۔
دوسری جانب ان کے بیٹے اور جے یو آئی کے دیگر قریبی حلقوں سے متعلق بھی مختلف سرکاری اداروں کی کارروائیوں اور نوٹسز کی اطلاعات سامنے آتی رہی ہیں۔ پشاور میں مفتی محمود مرکز اور بعض مدارس کو بھی سی ڈی اے اور متعلقہ حکام کی جانب سے تعمیراتی ضوابط سے متعلق نوٹسز جاری کیے جانے کی اطلاعات ہیں۔
تاہم جے یو آئی ان اقدامات کو سیاسی دباؤ اور انتقامی کارروائی قرار دیتی ہے، جبکہ حکومتی حلقوں کا مؤقف ہے کہ سرکاری ادارے قانون اور انتظامی ضوابط کے مطابق کارروائی کررہے ہیں۔
اسلام آباد کی انتظامیہ، ڈپٹی کمشنر عرفان میمن اور متعلقہ پولیس حکام سے مولانا فضل الرحمٰن کی رہائش گاہ کے باہر ناکہ بندی کی وجوہات جاننے کے لیے رابطے کی کوشش کی گئی، تاہم خبر کی تیاری تک کوئی باضابطہ وضاحت سامنے نہیں آئی۔
فی الحال یہ واضح نہیں کہ ناکہ بندی کسی مخصوص سکیورٹی خطرے، عدالتی کارروائی یا کسی انتظامی حکم کے تحت کی گئی ہے۔ جے یو آئی نے مطالبہ کیا ہے کہ حکومت فوری طور پر صورتحال واضح کرے اور مولانا فضل الرحمٰن کی رہائش گاہ کے باہر تعینات اہلکاروں کی موجودگی کی قانونی وجوہات تحریری طور پر فراہم کرے۔
اسلام آباد میں اس پیش رفت نے حکومت اور جے یو آئی کے درمیان پہلے سے موجود سیاسی تناؤ کو مزید نمایاں کردیا ہے، جبکہ جماعت کے رہنماؤں نے کارکنوں سے پرامن رہنے اور کسی بھی تصادم سے گریز کرنے کی اپیل کی ہے۔
