بین الاقوامی ڈیسک (پاک ٹوڈے): مشرقِ وسطیٰ میں جاری کشیدگی کے دوران شامی ذرائع نے تصدیق کی ہے کہ اسرائیلی جنگی طیاروں نے شام میں ایک ہوائی اڈے پر چار فضائی حملے کیے ہیں، جبکہ کارروائی کے دوران متعلقہ علاقے میں روشنی کے فلیئرز بھی گرائے گئے۔
واقعے کے بعد شامی وزارتِ خارجہ کی جانب سے باضابطہ بیان جاری کیا گیا ہے جس میں ان فضائی حملوں کی شدید مذمت کی گئی ہے۔ بیان میں کہا گیا ہے کہ اس اقدام سے شام کی خودمختاری اور علاقائی سالمیت کی خلاف ورزی کی گئی ہے، جو خطے کے امن و استحکام اور حساس صورتحال کے لیے ایک شدید تشویشناک پیش رفت ہے۔
عالمی امور کے ماہرین کا کہنا ہے کہ خطے میں ہوائی اڈوں اور بنیادی تنصیبات پر ایسے حملوں سے جاری کشیدگی کا دائرہ کار مزید پھیلنے کا خدشہ ہے، جس پر بین الاقوامی برادری کو فوری سنجیدگی کا مظاہرہ کرنے کی ضرورت ہے۔