پاکستانی ناظم الامور کو طلب کر کے فضائی حدود کی خلاف ورزی پر احتجاج، افغان وزارت خارجہ

کابل (پاک ٹوڈے): افغانستان کی وزارت خارجہ نے کابل میں تعینات پاکستان کے ناظم الامور کو طلب کرکے افغان فضائی حدود کی مبینہ خلاف ورزی اور افغان صوبوں میں پاکستانی فوج کے فضائی حملوں پر احتجاج ریکارڈ کرایا ہے۔

افغان وزارت خارجہ کے مطابق پاکستانی ناظم الامور کو احتجاجی مراسلہ بھی دیا گیا، جس میں کنڑ اور پکتیکا میں فضائی حملوں کو افغانستان کی خودمختاری اور علاقائی سالمیت کی خلاف ورزی قرار دیا گیا۔ افغان حکام نے پاکستان کی جانب سے افغانستان سے متعلق سیکیورٹی الزامات کو بھی مسترد کیا ہے۔

دوسری جانب پاکستان کے وزیر اطلاعات عطا تارڑ نے 24 ستمبر کو کہا تھا کہ پاکستان نے افغانستان میں 10 مقامات پر ڈرون اور فضائی حملے کیے۔ ان کے مطابق یہ کارروائی ان مقامات کے خلاف کی گئی جہاں ڈرونز کو لانچ اور ذخیرہ کیا جاتا تھا اور یہ اہداف پاکستان پر ہونے والے حالیہ حملوں سے براہ راست منسلک تھے۔

عطا تارڑ نے مزید کہا تھا کہ پاکستان نے کارروائی کو اپنے دفاع کے حق کے تحت کیا اور افغان سرزمین سے پاکستان کے خلاف ہونے والی کسی بھی کارروائی کو قبول نہیں کیا جائے گا۔ پاکستان نے یہ بھی کہا کہ کارروائی کا مقصد مخصوص فوجی اہداف کو نشانہ بنانا تھا۔

افغان وزارت خارجہ نے پاکستانی مؤقف کو مسترد کرتے ہوئے کہا ہے کہ افغانستان سے متعلق الزامات کو فوجی کارروائی کے جواز کے طور پر استعمال کیا جا رہا ہے۔