ریاض (پاک ٹوڈے): سعودیہ عرب کے ملکیتی آئل ٹینکر پر ہرمز کے قریب مبینہ ایرانی حملے کے نتیجے میں جہاز کے عملے کے دو فلپائنی رکن ہلاک ہو گئے ہیں، جس کے بعد خطے میں عسکری و سفارتی کشیدگی خطرناک حد تک بڑھ گئی ہے۔
سعودی قومی شپنگ کمپنی ‘بحری’ نے تصدیق کی ہے کہ ان کا بڑا تیل بردار جہاز ‘سدر’ ہرمز سے گزرتے ہوئے عمان کے جزیرہ نما مسندم کے شمال میں میزائل حملے کی زد میں آیا۔ اسی وقت ایک اور جنوبی کوریائی آئل ٹینکر ‘سینیگال پراسپیریٹی’ پر بھی قریبی سمندری حد میں حملے کی اطلاعات موصول ہوئی ہیں۔
سعودی وزارتِ خارجہ نے آئل ٹینکر کو نشانہ بنانے کے اقدام کی سخت الفاظ میں مذمت کرتے ہوئے اسے عالمی بحری تجارت کی سلامتی اور قانون کی سنگین خلاف ورزی قرار دیا ہے۔ دوسری جانب ایرانی حکام نے واضح موقف پیش کرنے کے بجائے موقف اختیار کیا کہ دونوں جہاز غیر مجاز راستے سے گزرتے ہوئے بحری سرنگوں کی زد میں آ کر آتشزدگی کا شکار ہوئے۔
یہ واقعہ ایک ایسے وقت میں پیش آیا ہے جب خطے میں امریکہ اور ایران کے درمیان فضائی اور میزائل حملوں کا سلسلہ شدید تر ہو گیا ہے۔ اقوامِ متحدہ کے سیکریٹری جنرل انتونیو گوتیرش نے تمام فریقین سے انتہائی ضبطِ نفس، سولینز کے تحفظ اور عسکری حل کے بجائے فوری طور پر سفارتی مذاکرات کی طرف لوٹنے کی اپیل کی ہے۔
