اسلام آباد (پاک ٹوڈے): وفاقی دارالحکومت اسلام آباد کی سرحد یونیورسٹی میں ایک فوجی افسر اور طلبہ کے درمیان تلخ کلامی کے بعد فائرنگ کا واقعہ سامنے آیا ہے، جس کی ویڈیو سوشل میڈیا پر تیزی سے وائرل ہو رہی ہے۔
تفصیلات کے مطابق، یونیورسٹی میں زیرِ تعلیم ایک خاتون کی شکایت پر مذکورہ افسر تعلیمی ادارے پہنچے، جہاں کسی طالب علم سے تلخ کلامی اور ہاتھا پائی کے بعد افسر نے اپنا پسٹل نکال کر فائرنگ کر دی۔ اس واقعے کے بعد یونیورسٹی میں شدید کشیدگی پھیل گئی اور طلبہ نے شدید احتجاج کرنا شروع کر دیا۔
پولیس کا کہنا ہے کہ متعلقہ افسر کے خلاف کارروائی کرتے ہوئے مقدمہ درج کر لیا گیا ہے اور قانون کے مطابق اقدامات کیے جا رہے ہیں۔ دوسری جانب ذرائع کے مطابق، پاک فوج کے اندرونی ڈسپلن اور قوانین کے تحت بھی اس افسر کے خلاف سخت عسکری انکوائری اور قانونی کارروائی عمل میں لائی جائے گی۔
