اسلام آباد (پاک ٹوڈے): حکومت نے بیرون ملک سفر کرنے والے تمام شہریوں اور بین الاقوامی مسافروں کے لیے حفاظتی ٹیکہ جات (ویکسینیشن) کی فراہمی اور اس کے سرٹیفکیٹ کو لازمی قرار دے دیا ہے۔ اس سلسلے میں وفاقی وزیر صحت مصطفیٰ کمال نے اسلام آباد میں قائم کیے گئے جدید ‘انٹرنیشنل ٹریولرز ویکسینیشن سینٹر’ کا باقاعدہ افتتاح کر دیا ہے۔
افتتاحی تقریب کے بعد میڈیا سے گفتگو کرتے ہوئے وفاقی وزیر صحت نے بتایا کہ نئے مرکز میں بین الاقوامی معیار کی سہولیات فراہم کی گئی ہیں جہاں آنے اور جانے والے مسافروں کو مطلوبہ حفاظتی ٹیکے لگائے جائیں گے۔ انہوں نے واضح کیا کہ حج و عمرہ کے زائرین اور دیگر بین الاقوامی مسافروں کے لیے گردن توڑ بخار (میننجائٹس)، فلو اور پولیو کی ویکسینیشن کا ڈیجیٹل سرٹیفکیٹ حاصل کرنا اب لازمی ہوگا، کیونکہ اکثر دیگر ممالک طبی بنیادوں پر مسافروں کو ڈی پورٹ کر دیتے ہیں۔
وفاقی وزیر کے مطابق اس تمام تر نظام کو شفاف اور جدید بنانے کے لیے مکمل طور پر کیش لیس اور ڈیجیٹائز کر دیا گیا ہے۔ مسافروں کا تمام ریکارڈ نادرا کے مرکزی ڈیٹا بیس سے منسلک ہوگا جس کی فوری جانچ ایئرپورٹ پر موجود محکمہ صحت اور نادرا کے قائم کردہ کاؤنٹرز کے ذریعے کی جا سکے گی۔
انہوں نے مزید کہا کہ مستقبل کے پالیسی اقدامات کے تحت پاکستان کا ہر قومی شناختی کارڈ نمبر ہی میڈیکل ریکارڈ نمبر کے طور پر استعمال کیا جائے گا، جس سے علاج معالجے کے لیے سفر کرنے والے مریضوں اور عمومی مسافروں کا مکمل ہیلتھ ڈیٹا محفوظ رہے گا۔
