راولپنڈی (پاک ٹوڈے): پاکستان نے پہلے ٹی ٹوئنٹی میچ میں سری لنکا کو 4 وکٹوں سے شکست دے دی۔ سری لنکا کی جانب سے دیے گئے 183 رنز کے ہدف کے تعاقب میں صاحبزادہ فرحان اور معاذ صداقت نے نمایاں بیٹنگ کا مظاہرہ کرتے ہوئے ٹیم کی فتح میں اہم کردار ادا کیا۔
صاحبزادہ فرحان نے 53 گیندوں پر 89 رنز کی شاندار اننگز کھیلی، جبکہ معاذ صداقت نے برق رفتار 50 رنز بنائے۔ دونوں بلے بازوں کی عمدہ کارکردگی نے پاکستان کی پوزیشن مستحکم کی اور ٹیم ہدف حاصل کرنے میں کامیاب رہی۔
اس سے قبل سری لنکن ٹیم نے پہلے بیٹنگ کرتے ہوئے مقررہ اوورز میں 8 وکٹوں کے نقصان پر 182 رنز بنائے۔ لہرو اڈارا نے 55 گیندوں پر 91 رنز کی دلکش اننگز کھیلی، تاہم ان کی یہ کوشش ٹیم کو کامیابی نہ دلا سکی۔
سری لنکا کی جانب سے کامل مشارا نے 6، داسن شناکا نے 18 اور کمینڈو مینڈس نے 23 رنز بنائے۔ پاکستان نے چار وکٹوں سے کامیابی حاصل کرکے سیریز کا آغاز فتح کے ساتھ کیا۔
