اسپورٹس ڈیسک (پاک ٹوڈے): ایشیا کپ رائزنگ اسٹارز کے گروپ بی کے آٹھویں میچ میں پاکستان اے نے بھارت اے کے خلاف پہلے بیٹنگ کرتے ہوئے 49.2 اوورز میں تمام وکٹوں کے نقصان پر 313 رنز بنا لیے اور حریف ٹیم کو جیت کے لیے 314 رنز کا ہدف دے دیا۔
پاکستان اے نے ٹاس جیت کر پہلے بیٹنگ کا فیصلہ کیا۔ اوپنر شمائل حسین نے 23 گیندوں پر 33 رنز بنائے، جبکہ معاذ صداقت نے 63 گیندوں پر 59 رنز کی اننگز کھیلی۔ روہیل نذیر صرف 3 گیندیں کھیل کر بغیر کوئی رن بنائے آؤٹ ہوئے۔
حسن نواز پاکستان کی جانب سے سب سے نمایاں بلے باز رہے، انہوں نے 82 گیندوں پر 79 رنز بنائے، جس میں 5 چوکے اور 4 چھکے شامل تھے۔ فرحان یوسف نے 48 گیندوں پر 56 رنز کی جارحانہ اننگز کھیلی، ان کے حصے میں 4 چوکے اور 2 چھکے آئے۔
کپتان عبدالصمد نے 35 گیندوں پر 28 رنز بنائے، محمد عمران نے 14 گیندوں پر 23 رنز کی تیز رفتار اننگز کھیلی، جبکہ سعد مسعود نے 9، احمد دانیال نے 8، سفیان مقیم نے ناٹ آؤٹ 3 اور علی رضا نے 2 رنز بنائے۔ اضافی رنز کی تعداد 13 رہی۔
بھارت اے کی جانب سے ہرشت رانا نے 77 رنز دے کر 2 وکٹیں حاصل کیں، پرنس یادو نے 60 رنز کے عوض 2 کھلاڑیوں کو آؤٹ کیا۔ سوریانش شیڈگے نے 55 رنز دے کر 2، وی نگم نے 46 رنز دے کر 2 جبکہ اے بدونی نے 18 رنز کے عوض ایک وکٹ حاصل کی۔ شہباز احمد اور ابھیشیک شرما کوئی وکٹ حاصل نہ کر سکے۔
پاکستان اے کی اننگز 49.2 اوورز میں 313 رنز پر مکمل ہوئی، جس کے بعد بھارت اے کو کامیابی کے لیے 314 رنز درکار ہیں۔
