کراچی (پاک ٹوڈے): پاکستان پیپلز پارٹی کے چیئرمین بلاول بھٹو زرداری نے کہا ہے کہ ملک کا نظام خودبخود تباہ نہیں ہوا بلکہ اسے باقاعدہ تباہ کرایا گیا، جس میں وہ خود کو بھی قصوروار سمجھتے ہیں۔ ان کا کہنا تھا کہ پاکستان کو موجودہ حالات سے نکالنے کے لیے نظام کو سیاسی بنیادوں پر ری سیٹ کرنے اور ریاستی اداروں پر عوام کا اعتماد بحال کرنے کی ضرورت ہے۔
کراچی پریس کلب میں ’میٹ دی پریس‘ سے خطاب کرتے ہوئے بلاول بھٹو زرداری نے ملک کی معاشی صورتحال پر تشویش کا اظہار کیا اور کہا کہ انہوں نے اپنی زندگی میں اتنے خراب معاشی حالات نہیں دیکھے۔ غربت، بے روزگاری اور مہنگائی جس تیزی سے بڑھ رہی ہے، وہ اس معاشی صورتحال سے خوفزدہ ہیں۔
انہوں نے کہا کہ عوام بجلی کے بل دیکھ کر پریشان ہوجاتے ہیں اور انہیں بچوں کی تعلیمی فیس ادا کرنے یا گھر کے لیے دو وقت کی روٹی کا بندوبست کرنے میں سے کسی ایک کا انتخاب کرنا پڑ رہا ہے۔ اسی طرح لوگوں کو بزرگوں کے علاج اور روزمرہ خوراک کی ضروریات کے درمیان بھی فیصلہ کرنا پڑتا ہے۔
بلاول بھٹو زرداری نے کہا کہ ملک میں نفرت اور تقسیم کی سیاست جاری ہے، جبکہ غریب اور پسماندہ طبقے کے حقیقی مسائل پر توجہ نہیں دی جا رہی۔ ان کے بقول نظام کو ری سیٹ کرنا ہے تو یہ عمل غیرسیاسی نہیں بلکہ سیاسی ہونا چاہیے، کیونکہ سیاستدان عوام کے اصل نمائندے ہیں۔
انہوں نے حکومت پر زور دیا کہ وہ تمام سیاسی اسٹیک ہولڈرز کا اعتماد بحال کرے۔ ان کا کہنا تھا کہ ملک کو اہم سیاسی قوتوں کو ساتھ لیے بغیر نہیں چلایا جا سکتا، اس لیے حکومت کو مولانا فضل الرحمان کے ساتھ ساتھ عمران خان اور پاکستان تحریک انصاف کا اعتماد بھی بحال کرنا ہوگا۔
بلاول بھٹو نے کہا کہ مولانا فضل الرحمان کا کام حکومت پر تنقید کرنا ہے اور حکومت کو ان کے سوالات کے جواب دینے چاہئیں، چاہے یہ سوالات اسے کتنے ہی ناگوار کیوں نہ گزریں۔ اپوزیشن کی حب الوطنی پر شک کرنا پارلیمان اور ملک کے ساتھ ناانصافی ہے۔
انہوں نے پی ڈی ایم دور میں مولانا فضل الرحمان کے کردار کا حوالہ دیتے ہوئے حکومت میں شامل رہنماؤں کو تنقید کا نشانہ بنایا اور کہا کہ انہیں مولانا کی سیاسی جدوجہد کو فراموش نہیں کرنا چاہیے۔
میڈیا کی آزادی پر بات کرتے ہوئے بلاول بھٹو زرداری کا کہنا تھا کہ جس معاشرے میں میڈیا آزاد نہ ہو، وہ زیادہ دیر تک نہیں چل سکتا۔ صحافیوں کو اگر سچ بولنے پر پیکا قانون یا کسی دوسرے قانون کے تحت کارروائی کا خدشہ ہو تو آزادانہ صحافت ممکن نہیں رہتی، جبکہ ایسی صورتحال میں ملک اور معاشرہ بھی ترقی نہیں کر سکتا۔
