اسلام الدین ساجد
اسلام آباد (پاک ٹوڈے): پاکستان کے صوبہ پنجاب میں وزیراعلیٰ مریم نواز اور ان کی اتحادی جماعتوں کے درمیان سیاسی کشیدگی شدت اختیار کرگئی ہے، جہاں وفاقی وزیر چوہدری سالک حسین نے مبینہ کرپشن سے متعلق اپنے الزامات واپس لینے اور معافی مانگنے سے انکار کردیا ہے، جبکہ استحکام پاکستان پارٹی کے سربراہ اور وفاقی وزیر علیم خان کے ساتھ بھی پنجاب حکومت کے اختلافات کھل کر سامنے آنے لگے ہیں۔
سیاسی مبصرین کے مطابق مسلم لیگ (ن) کی پنجاب حکومت کو بیک وقت اپنے دونوں اہم اتحادیوں کے ساتھ بڑھتی ہوئی کشیدگی کا سامنا ہے، جو آنے والے دنوں میں وزیراعلیٰ مریم نواز کے لیے سیاسی مشکلات پیدا کرسکتی ہے۔
روزنامہ ڈان کی رپورٹ کے مطابق وفاقی وزیر برائے سمندر پار پاکستانی چوہدری سالک حسین نے وزیراعلیٰ مریم نواز کی جانب سے بھیجے گئے پانچ ارب روپے کے ہرجانے کے قانونی نوٹس کا جواب دیتے ہوئے اپنے الزامات واپس لینے اور معافی مانگنے سے انکار کردیا ہے۔
چوہدری سالک نے اپنے جواب میں کہا ہے کہ وہ کسی بھی قانونی فورم پر اپنے مؤقف کا دفاع کریں گے اور اپنے بیانات واپس نہیں لیں گے۔
اس پیش رفت کے بعد پنجاب کی وزیر اطلاعات عظمیٰ بخاری نے اعلان کیا ہے کہ مریم نواز کی حکومت چوہدری سالک کے خلاف قانونی کارروائی کرے گی۔
عظمیٰ بخاری نے ڈان سے گفتگو کرتے ہوئے الزام لگایا کہ چوہدری سالک نے بغیر ثبوت پنجاب حکومت پر کرپشن کے الزامات عائد کیے ہیں۔ ان کے مطابق وزیراعلیٰ مریم نواز انہیں عدالت لے جائیں گی۔
تاہم چوہدری سالک نے بھی جوابی کارروائی کرتے ہوئے مریم نواز اور عظمیٰ بخاری کو ہرجانے کے قانونی نوٹس بھجوا دیے ہیں، جن میں ان پر اپنے خلاف غلط اور ساکھ کو نقصان پہنچانے والے بیانات دینے کا الزام لگایا گیا ہے۔
یہ تنازع اس وقت شروع ہوا جب چوہدری سالک حسین نے ایک ٹی وی انٹرویو میں کہا تھا کہ انہیں پنجاب میں کرپشن سے متعلق مسلسل شکایات موصول ہوتی ہیں۔ انہوں نے صوبائی حکومت کے اخراجات، بالخصوص سرکاری طیارے کے استعمال پر بھی تنقید کی تھی۔
سالک حسین نے اپنے انٹرویو میں مریم نواز پر تنقید کرتے ہوئے کہا تھا کہ انہیں اختلافی آوازیں سننے کی عادت نہیں رہی اور گزشتہ دو برس کے دوران ان کے بارے میں بات کرنے والوں کو دبانے کی کوشش کی جاتی رہی ہے۔
انہوں نے یہ بھی کہا تھا کہ وزیراعلیٰ مریم نواز نے ان سے وفاقی وزارت چھوڑنے کا مطالبہ کیا ہے، تاہم اگر ان کے اتحادی انہیں عہدہ چھوڑنے کا کہیں گے تو وہ وزارت سے مستعفی ہونے کے لیے تیار ہیں۔ ان کا سوال تھا کہ اگر ان سے استعفے کا مطالبہ کیا جارہا ہے تو مریم نواز خود عہدہ کیوں نہیں چھوڑتیں؟
دوسری جانب مریم نواز نے بھی پہلے ایک بیان میں اشارہ دیا تھا کہ انہیں معلوم ہے کہ کون کہاں جاتا ہے اور کن لوگوں سے ملاقاتیں کرتا ہے۔ ان کے اس بیان کو بعض حلقوں نے اپنی حکومت کے خلاف مبینہ سیاسی سرگرمیوں اور سازشوں سے جوڑا تھا۔
اسپیکر پنجاب اسمبلی کا بیان بھی زیر بحث
اسی سیاسی ماحول میں پنجاب اسمبلی کے اسپیکر ملک احمد خان کا ایک بیان بھی سیاسی بحث کا موضوع بن گیا ہے۔
ملک احمد خان نے نئے صوبوں کے قیام سے متعلق مجوزہ ریفرنڈم کی حمایت کرتے ہوئے کہا تھا کہ وہ فارم 47 کے ذریعے منتخب ہوکر اسمبلی میں نہیں آئے بلکہ عوام کے ووٹوں سے کامیاب ہوئے ہیں۔
اس بیان کو بعض سیاسی تجزیہ نگاروں نے مریم نواز اور مسلم لیگ (ن) کی قیادت پر بالواسطہ تنقید قرار دیا، کیونکہ وزیراعظم شہباز شریف اور مریم نواز سمیت مسلم لیگ (ن) کے متعدد رہنماؤں پر مخالفین کی جانب سے فارم 47 کے ذریعے انتخابی کامیابی حاصل کرنے کے الزامات عائد کیے جاتے رہے ہیں۔
تاہم جیو نیوز کے پروگرام میں اینکر شاہ زیب خانزادہ سے گفتگو کرتے ہوئے ملک احمد خان نے اس تاثر کی تردید کی کہ ان کا بیان مریم نواز کے خلاف تھا۔
انہوں نے وضاحت کی کہ ایک پروگرام میں تمام ارکان اسمبلی پر فارم 47 کے ذریعے منتخب ہونے کا الزام عائد کیا گیا تھا، جس پر انہوں نے اپنے انتخاب کے حوالے سے وضاحت پیش کی تھی۔
ملک احمد خان نے وزیراعلیٰ مریم نواز کے ساتھ کسی بھی قسم کے اختلافات کی بھی تردید کی۔
اس کے باوجود سیاسی حلقوں میں یہ قیاس آرائیاں جاری ہیں کہ پنجاب میں مستقبل میں کسی سیاسی تبدیلی کی صورت میں ملک احمد خان کو وزیراعلیٰ کے متبادل امیدوار کے طور پر دیکھا جاسکتا ہے۔ تاہم اس حوالے سے کوئی باضابطہ پیش رفت سامنے نہیں آئی۔
علیم خان کے ساتھ بھی اختلافات شدت اختیار کرگئے
مریم نواز حکومت کو صرف چوہدری سالک حسین کے ساتھ ہی اختلافات کا سامنا نہیں بلکہ وفاقی وزیر اور استحکام پاکستان پارٹی کے سربراہ علیم خان کے ساتھ بھی کشیدگی بڑھ رہی ہے۔
علیم خان مسلم لیگ (ن) کی وفاقی حکومت کے اہم اتحادی ہیں، تاہم پنجاب حکومت اور ان کے درمیان اختلافات اب سوشل میڈیا اور ذرائع ابلاغ کے ذریعے بھی سامنے آنے لگے ہیں۔
اطلاعات کے مطابق پنجاب حکومت کی جانب سے علیم خان کے ایک نجی تعلیمی ادارے کو بند کرنے اور دوسرے ادارے کے خلاف بھی کارروائی کی اطلاعات کے بعد اختلافات میں اضافہ ہوا ہے۔ اس دوران مسلم لیگ (ن) سے تعلق رکھنے والے بعض صوبائی وزرا نے علیم خان کے ٹی وی چینل سماء نیوز کی جانب سے پنجاب حکومت پر کی جانے والی تنقید کو بھی نشانہ بنایا ہے۔
سینئر صحافی طلعت حسین نے اس صورتحال پر تبصرہ کرتے ہوئے پنجاب حکومت کے وزرا کو خبردار کیا ہے کہ انہیں کسی میڈیا ادارے کو سیاسی اختلافات کی بنیاد پر نشانہ نہیں بنانا چاہیے۔
ان کا کہنا تھا کہ سماء نیوز میں تقریباً 900 افراد کام کرتے ہیں اور اگر علیم خان کے ساتھ حکومت کو کوئی مسئلہ ہے تو اسے ان کے ساتھ بیٹھ کر حل کرنا چاہیے۔
طلعت حسین کے مطابق اگر حکومت کو سماء نیوز کی کسی خبر پر اعتراض ہے تو اسے قانونی راستہ اختیار کرنا چاہیے اور شواہد کے ذریعے ثابت کرنا چاہیے کہ خبر غلط ہے۔
انہوں نے کہا کہ میڈیا ادارے کو نشانہ بنانے کے بجائے سیاسی اختلافات متعلقہ شخصیات کے درمیان بات چیت کے ذریعے حل کیے جانے چاہئیں۔
رانا ثناء اللہ کی وضاحت اور اسلام آباد کی سیاسی سرگوشیاں
دوسری جانب وزیراعظم کے مشیر برائے سیاسی امور رانا ثناء اللہ نے پنجاب حکومت پر کرپشن کے الزامات کے حوالے سے کہا ہے کہ اگر کسی کے پاس بدعنوانی کے ٹھوس ثبوت موجود ہیں تو وہ ان کے ساتھ شیئر کرے تاکہ وہ انہیں وزیراعظم اور وزیراعلیٰ تک پہنچا سکیں اور ضروری کارروائی کی جاسکے۔
انہوں نے کہا کہ اگر کسی کے پاس شواہد موجود نہیں تو محض الزامات لگانے سے گریز کرنا چاہیے۔
ادھر صحافی اسد طور نے اپنے تبصرے میں دعویٰ کیا ہے کہ مریم نواز کے لیے چوہدری سالک حسین کے معاملے کو سیاسی طور پر آگے بڑھانا آسان نہیں، کیونکہ سالک وفاقی حکومت میں شامل ایک اتحادی جماعت سے تعلق رکھتے ہیں اور ان کے خلاف کارروائی کا فیصلہ وفاقی سطح پر بھی سیاسی اثرات مرتب کرسکتا ہے۔
اسد طور کے مطابق مریم نواز اپنے چچا اور وزیراعظم شہباز شریف سے بھی اس معاملے پر آسانی سے چوہدری سالک کو وفاقی کابینہ سے نکالنے کا مطالبہ نہیں کرسکتیں۔ انہوں نے فارم 47 کے معاملے کو بھی مسلم لیگ (ن) کی قیادت کے لیے ایک سیاسی مشکل قرار دیا۔
پنجاب حکومت کے سرکاری لگژری طیارے کو پاک فضائیہ کے حوالے کرنے کے معاملے پر بھی صوبائی وزیر اطلاعات عظمیٰ بخاری نے نئی وضاحت پیش کی ہے۔ ان کے مطابق طیارے کی دیکھ بھال پاکستان ایئر فورس کے سپرد کرنا معمول کا انتظامی فیصلہ ہے اور مریم نواز سے طیارہ کسی نے زبردستی نہیں لیا، کیونکہ فضائیہ پہلے ہی وزیراعظم اور دیگر اعلیٰ حکام کے زیر استعمال طیاروں کی دیکھ بھال کرتی ہے۔
دوسری جانب عظمیٰ بخاری کا کہنا ہے کہ پنجاب میں مریم نواز کی حکومت کی ترقی مخالفین کے اعصاب پر سوار ہے اور اسی وجہ سے حکومت کو تنقید کا نشانہ بنایا جارہا ہے۔
کیا مریم نواز کے لیے سیاسی مشکلات بڑھ رہی ہیں؟
اسلام آباد کے سیاسی اور باخبر حلقوں میں یہ تاثر بھی پایا جاتا ہے کہ مریم نواز کی بعض پالیسیوں اور طرز حکمرانی سے وفاقی دارالحکومت اور راولپنڈی کے بااثر حلقے پوری طرح مطمئن نہیں ہیں۔ تاہم اس حوالے سے کوئی باضابطہ تصدیق سامنے نہیں آئی۔
سیاسی تجزیہ نگاروں کے مطابق چوہدری سالک حسین اور علیم خان جیسے اتحادیوں کے ساتھ بیک وقت اختلافات مسلم لیگ (ن) کے لیے ایک نیا چیلنج بن سکتے ہیں۔
چوہدری سالک کی جانب سے معافی مانگنے اور الزامات واپس لینے سے انکار، علیم خان کے ساتھ میڈیا اور تعلیمی اداروں کے معاملات پر بڑھتی ہوئی کشیدگی اور پنجاب اسمبلی کے اندر سامنے آنے والے سیاسی بیانات نے یہ سوال پیدا کردیا ہے کہ آیا مریم نواز آنے والے دنوں میں اپنے اتحادیوں کو ساتھ رکھنے میں کامیاب رہیں گی یا پنجاب کی سیاست میں ایک نئی محاذ آرائی جنم لے گی۔
