اسلام الدین ساجد| اسلام آباد، پاک ٹوڈے
اسلام آباد (پاک ٹوڈے): پاکستان کے نائب وزیراعظم اور وزیر خارجہ اسحاق ڈار نے علاقائی تنازعات اور عدم استحکام کے معاشی اثرات پر تشویش کا اظہار کرتے ہوئے کہا ہے کہ امن، اعتماد اور سفارت کاری کے بغیر خطے میں اقتصادی تعاون اور رابطوں کو مؤثر انداز میں فروغ نہیں دیا جا سکتا۔
اسلام آباد میں اقتصادی تعاون تنظیم (ای سی او) کی کونسل آف منسٹرز کے 30ویں اجلاس کے افتتاحی خطاب میں اسحاق ڈار نے کہا کہ موجودہ جغرافیائی سیاسی غیر یقینی صورت حال، معاشی دباؤ اور تیز رفتار تکنیکی تبدیلیوں کے باعث علاقائی تعاون کی ضرورت پہلے سے زیادہ بڑھ گئی ہے۔
انہوں نے کہا کہ خطے کے متعدد مسائل قومی سرحدوں تک محدود نہیں رہتے اور ان سے نمٹنے کے لیے رکن ممالک کے درمیان قریبی رابطہ، مشترکہ حکمت عملی اور اجتماعی اقدامات ضروری ہیں۔
اسحاق ڈار کے مطابق تنازعات اور عدم استحکام کے اثرات سرحدوں سے باہر تک پھیلتے ہیں اور تجارتی راستوں، توانائی کی فراہمی، سرمایہ کاری اور عوام کی معاشی ترقی کو متاثر کرتے ہیں۔ انہوں نے کہا کہ پاکستان تنازعات کے پرامن حل کے لیے اقوام متحدہ کے چارٹر اور بین الاقوامی قانون کے مطابق مذاکرات اور سفارت کاری کی حمایت کرتا ہے۔
انہوں نے کہا کہ وزیراعظم شہباز شریف، چیف آف ڈیفنس فورسز فیلڈ مارشل عاصم منیر اور پاکستانی دفتر خارجہ برادر ممالک اور بین الاقوامی شراکت داروں کے ساتھ رابطوں کے ذریعے پرامن حل، کشیدگی میں کمی اور دیرپا علاقائی استحکام کے لیے سفارتی کوششیں کر رہے ہیں۔
پاکستانی وزیر خارجہ نے اس بات پر بھی زور دیا کہ معاشی تعاون اور امن ایک دوسرے سے جڑے ہوئے ہیں۔ ان کے مطابق اقتصادی روابط مشترکہ مفادات اور استحکام کو فروغ دیتے ہیں، جبکہ عدم تحفظ ترقیاتی منصوبوں اور معاشی شراکت داری کو نقصان پہنچا سکتا ہے۔
انہوں نے کہا کہ ای سی او کے رکن ممالک کو اختلافات کے حل کے لیے مکالمے، بین الاقوامی معاہدوں کے احترام اور ریاستوں کے درمیان اعتماد سازی کو ترجیح دینی چاہیے۔ ان کے بقول علاقائی رابطوں کا انحصار صرف سڑکوں اور تجارتی راستوں پر نہیں بلکہ اس اعتماد پر بھی ہے کہ ممالک اپنے بین الاقوامی وعدوں اور ذمہ داریوں کو پورا کریں گے۔
پاکستان کی سربراہی میں پانچ ترجیحات
اسحاق ڈار نے کہا کہ پاکستان 2026 اور 2027 کے لیے ای سی او کی سربراہی کر رہا ہے اور اس مدت کے دوران تنظیم کے تعاون کو نئی قوت دینا اس کی ترجیحات میں شامل ہوگا۔ پاکستان نے اپنی سربراہی کے لیے ’’لچکدار اور مضبوط ای سی او کے لیے علاقائیت کی بحالی‘‘ کا عنوان مقرر کیا ہے۔
انہوں نے پاکستان کی سربراہی کے دوران پانچ بنیادی ترجیحات کا اعلان کیا، جن میں علاقائی تجارت اور سرمایہ کاری میں اضافہ، ٹرانسپورٹ اور راہداریوں کے روابط مضبوط بنانا، ای سی او تجارتی معاہدے کو آگے بڑھانا، موسمیاتی تبدیلی اور قدرتی آفات سے نمٹنے کے لیے تعاون اور نوجوانوں کی تعلیم، تحقیق اور فنی تربیت میں سرمایہ کاری شامل ہیں۔
ان کے مطابق پاکستان وسطی ایشیا کو جنوبی ایشیا اور بحیرہ عرب کی بندرگاہوں سے ملانے والے ٹرانسپورٹ اور تجارتی راستوں کو بہتر بنانے کے لیے رکن ممالک کے ساتھ کام کرے گا۔ کسٹمز کے طریقہ کار میں ہم آہنگی، سرحدی انتظامات میں بہتری اور قابلِ اعتماد ٹرانزٹ نظام خطے میں تجارت کے فروغ کے لیے ضروری ہیں۔
انہوں نے ای سی او کے تجارتی معاہدے کو جدید بنانے اور ڈیجیٹل بنیادوں پر علاقائی تجارت کا زیادہ مؤثر نظام تشکیل دینے کی ضرورت پر بھی زور دیا۔ ان کا کہنا تھا کہ موسمیاتی تبدیلی، قدرتی آفات اور پانی و توانائی کے وسائل پر بڑھتے ہوئے دباؤ جیسے مشترکہ مسائل سے نمٹنے کے لیے بھی علاقائی تعاون ناگزیر ہے۔
آر سی ڈی سے ای سی او تک: تنظیم کا تاریخی پس منظر
اقتصادی تعاون تنظیم کی بنیاد پاکستان، ایران اور ترکیہ نے 1964 میں علاقائی تعاون برائے ترقی (آر سی ڈی) کے نام سے رکھی تھی۔ اس تنظیم کا مقصد تینوں ممالک کے درمیان اقتصادی، تکنیکی اور ثقافتی تعاون کو فروغ دینا تھا۔
1985 میں ان تینوں ممالک نے آر سی ڈی کو نئے ادارہ جاتی ڈھانچے کے تحت اقتصادی تعاون تنظیم (ای سی او) میں تبدیل کر دیا۔ سوویت یونین کے خاتمے اور وسطی ایشیا کی نئی آزاد ریاستوں کے ظہور کے بعد 1992 میں تنظیم کی رکنیت میں توسیع کی گئی اور سات نئے ممالک اس میں شامل ہوئے۔
ان ممالک میں افغانستان، آذربائیجان، قازقستان، کرغزستان، تاجکستان، ترکمانستان اور ازبکستان شامل تھے۔ اس توسیع کے بعد ای سی او کے رکن ممالک کی تعداد تین سے بڑھ کر دس ہو گئی اور تنظیم کا دائرہ جنوبی ایشیا، مغربی ایشیا اور وسطی ایشیا تک پھیل گیا۔
اجلاس میں کون کون شریک ہے؟
پاکستان کی میزبانی میں ہونے والے اجلاس میں ای سی او کے دس رکن ممالک میں سے نو ممالک کے نمائندے شرکت کر رہے ہیں، جن میں پاکستان، ایران، ترکیہ، آذربائیجان، قازقستان، کرغزستان، تاجکستان، ترکمانستان اور ازبکستان شامل ہیں۔
اسلام آباد پہنچنے والی نمایاں شخصیات میں ایران کے وزیر خارجہ عباس عراقچی، ترکمانستان کے وزیر خارجہ رشید مردوف، ترکیہ کے نائب وزیر خارجہ موسیٰ کلاکلی کایا، آذربائیجان کے نائب وزیر خارجہ النور ممدوف، قازقستان کے نائب وزیر خارجہ ارمان اساگالیف اور کرغزستان کے نائب وزیر خارجہ کائرات ترسُنکولوف شامل ہیں۔
اجلاس میں اسلامی تعاون تنظیم (او آئی سی) کے سیکریٹری جنرل اسماعیل ولد شیخ احمد اور شنگھائی تعاون تنظیم (ایس سی او) کے نائب سیکریٹری جنرل احمد سعیدموردوزودا بھی شریک ہیں۔ ترک جمہوریہ شمالی قبرص کے وزیر خارجہ طاہسین ارتغرول اوغلو بھی اسلام آباد پہنچے ہیں۔
تاہم اجلاس میں افغانستان کا کوئی نمائندہ شریک نہیں ہوا، کیونکہ پاکستان نے دونوں ممالک کے درمیان جاری کشیدگی کے باعث افغان طالبان حکومت کو دعوت نہیں دی تھی۔
ای سی او کا صدر دفتر تہران میں واقع ہے اور اس کا مقصد رکن ممالک کے درمیان تجارت، اقتصادی ترقی، ٹرانسپورٹ، توانائی اور علاقائی رابطوں کو فروغ دینا ہے۔
