راولپنڈی (پاک ٹوڈے): پاکستان تحریک انصاف کے بانی اور سابق وزیراعظم عمران خان نے اپنی صحت سے متعلق خدشات اور عدالتی احکامات پر عمل درآمد کے لیے چیف جسٹس آف پاکستان سمیت تین اعلیٰ عدالتی عہدیداروں کو خط لکھ دیا ہے۔
16 نومبر کو لکھے گئے اس خط میں عمران خان نے چیف جسٹس آف پاکستان، چیف جسٹس وفاقی آئینی عدالت اور چیف جسٹس اسلام آباد ہائیکورٹ سے اپیل کی ہے کہ ان کی صحت اور بنیادی حقوق سے متعلق معاملات پر فوری توجہ دی جائے۔
خط میں عمران خان نے مؤقف اختیار کیا ہے کہ ڈاکٹروں نے انہیں خبردار کیا ہے کہ بلڈ پریشر قابو میں نہ آنے کی صورت میں انہیں برین ہیمرج اور دل کا دورہ پڑنے کا خطرہ ہے۔ ان کے مطابق گزشتہ ہفتے بلڈ پریشر 192 سے 193 تک پہنچ گیا تھا، جس سے طبی خدشات میں اضافہ ہوا ہے۔
عمران خان نے خط میں سپریم کورٹ کے 18 اگست 2026 کے حکم کا حوالہ دیتے ہوئے کہا ہے کہ انہیں دو روز کے اندر شفا انٹرنیشنل اسپتال منتقل کرنے اور ماہر امراض قلب و چشم پر مشتمل میڈیکل بورڈ تشکیل دینے کے احکامات پر عمل درآمد نہیں کیا گیا۔
انہوں نے اڈیالہ جیل میں مبینہ طور پر طویل تنہائی، اہل خانہ اور وکلا سے ملاقاتوں میں رکاوٹوں اور دیگر سہولیات کی عدم فراہمی پر بھی تحفظات کا اظہار کیا ہے۔ ان کا کہنا ہے کہ ان کی دائیں آنکھ کی بینائی میں بھی نمایاں کمی واقع ہوئی ہے۔
خط میں عمران خان نے اپنی اہلیہ بشریٰ بی بی کی صحت کا معاملہ بھی اٹھایا اور مؤقف اختیار کیا کہ انہیں آنکھ کے علاج اور ممکنہ دوسری سرجری کے لیے مناسب طبی سہولیات فراہم کی جانی چاہئیں۔
بانی پی ٹی آئی نے کہا کہ وہ کوئی خصوصی رعایت نہیں مانگ رہے بلکہ صرف عدالتی احکامات پر عمل درآمد، مناسب طبی علاج اور اپنے آئینی حقوق کا تحفظ چاہتے ہیں۔ انہوں نے خط میں لکھا کہ ’’زندہ رہوں گا تو اپنی بے گناہی ثابت کروں گا۔‘‘
یہ خط بیرسٹر سلمان صفدر کے ذریعے چیف جسٹس تک پہنچایا گیا ہے۔ خط میں بیان کردہ طبی خدشات عمران خان کا مؤقف ہیں۔
