18
سیالکوٹ (پاک ٹوڈے): سیالکوٹ کے علاقے سمبڑیال میں نامعلوم ڈاکوؤں نے سنار کے گھر سے ساڑھے 3 کروڑ روپے مالیت کا سونا لوٹ لیا، تاہم پولیس کے تعاقب پر ملزمان لوٹا گیا سونا کھیتوں میں پھینک کر فرار ہوگئے۔
تفصیلات کے مطابق سمبڑیال کے گاؤں جیٹھیکے میں صبح تقریباً 4 بجے دو ڈاکو گھر کے عقبی حصے سے سیڑھی لگا کر اندر داخل ہوئے اور گھر میں موجود سونا لے کر فرار ہوگئے۔ واردات کے فوری بعد متاثرہ سنار نے پولیس کو اطلاع دی۔
ڈسٹرکٹ پولیس آفیسر (ڈی پی او) کے مطابق اطلاع ملتے ہی پولیس نے ملزمان کا تعاقب شروع کیا، جس پر ڈاکو سونا کھیتوں میں پھینک کر فرار ہوگئے۔
پولیس نے کھیتوں سے برآمد ہونے والا سونا تاجر کے حوالے کر دیا ہے، جبکہ واقعے کے سلسلے میں ایک مشکوک شخص کو حراست میں لے کر مزید تفتیش شروع کر دی گئی ہے۔
