پشاور (پاک ٹوڈے): خیبر پختونخوا کے وزیراعلیٰ سہیل آفریدی نے کہا ہے کہ پاکستان تحریک انصاف ملک کی بڑی سیاسی جماعت ہے اور آئین ہر شہری کو پرامن احتجاج کا حق دیتا ہے۔
سہیل آفریدی نے اعلان کیا کہ 4 اکتوبر کو عوامی قافلہ گنڈی چوک لکی مروت سے روانہ ہوگا اور آئین و قانون کی بالادستی اور آزاد عدلیہ کی بحالی کیلئے جدوجہد جاری رکھی جائے گی۔ ان کے مطابق تحریک انصاف کے مطالبات آئین اور قانون کے مطابق ہیں۔
وزیراعلیٰ نے الزام عائد کیا کہ ماضی میں بعض افراد کو غیر قانونی سہولتیں فراہم کی گئیں، تاہم ایک سیاسی رہنما کے خوف کے باعث انہیں، ان کے خاندان اور کارکنوں کو قانونی حقوق سے محروم کیا جارہا ہے۔ انہوں نے کہا کہ جو لوگ زبردستی پاکستان پر قابض ہیں، وہ عوام سے خوفزدہ ہیں۔
دہشت گردی سے متعلق سہیل آفریدی نے کہا کہ یہ مسئلہ خیبر پختونخوا اور پاکستان کے عوام کیلئے محض بیانیے کی جنگ نہیں بلکہ ہر شہری اس سے متاثر ہے۔ ان کے مطابق عمران خان ہمیشہ فوجی آپریشنز اور لوگوں کی بے دخلی کو مسئلے کا پائیدار حل قرار نہیں دیتے رہے، جبکہ ڈرون حملے اور مبینہ کولیٹرل ڈیمیج شدت پسندی میں اضافے کا سبب بنتے ہیں۔
انہوں نے دعویٰ کیا کہ دہشت گردی کے خلاف یہ مؤقف اب صرف تحریک انصاف تک محدود نہیں بلکہ صوبے کی مختلف سیاسی و مذہبی جماعتوں اور مکاتب فکر کی جانب سے بھی اس کی حمایت کی گئی ہے۔
سہیل آفریدی نے مزید دعویٰ کیا کہ تحریک انصاف کی وفاقی حکومت کے دور میں پاکستان اور خیبر پختونخوا سیاحت کیلئے معروف تھے، تاہم حکومت کی تبدیلی کے بعد دہشت گردی کو جان بوجھ کر خیبر پختونخوا پر مسلط کیا گیا۔
وزیراعلیٰ نے کہا کہ اگر خیبر پختونخوا میں امن کے قیام کیلئے پالیسی تبدیل کرنے کی ضرورت ہے تو اس پر عمل ہونا چاہیے۔ انہوں نے سوال اٹھایا کہ صوبائی وزراء اور کارکنوں کے مبینہ اغوا، پولیس کو فراہم کیے جانے والے ہتھیاروں کی عدم دستیابی اور پولیس پر دباؤ کا ذمہ دار کون ہے۔
انہوں نے کہا کہ اگر بلوچستان اور وفاقی حکومت ایک صفحے پر ہیں تو وہاں بھی امن کیوں نہیں آرہا۔ سہیل آفریدی نے دہشت گردی کے حوالے سے موجودہ پالیسی پر تنقید کرتے ہوئے پالیسی میں تبدیلی پر زور دیا۔
9 مئی کے واقعات سے متعلق سہیل آفریدی نے کہا کہ تحریک انصاف نہ دوبارہ 9 مئی ہونے دے گی اور نہ کسی اور کو ایسا کرنے دے گی۔ انہوں نے الزام عائد کیا کہ سی سی ٹی وی فوٹیج لے جانے والے ہی 9 مئی کے منصوبہ ساز ہیں۔
وزیراعلیٰ نے کہا کہ 4 اکتوبر کو دوپہر ایک بجے گنڈی چوک لکی مروت سے مارچ شروع ہوگا۔
