اسلام آباد (پاک ٹو ڈے): قومی کرکٹ ٹیم کی ٹیسٹ کرکٹ میں مسلسل ناقص کارکردگی نے ایک بار پھر تاریک تاریخ دہرائی ہے۔ انگلینڈ کے خلاف لارڈز ٹیسٹ میں ناکامی کے بعد 1987 کے بعد پہلی بار پاکستان کا مجموعی ٹیسٹ ریکارڈ منفی رخ اختیار کر گیا ہے، جہاں جیت کے مقابلے شکستوں کی تعداد بڑھ گئی ہے۔
تفصیلات کے مطابق، لارڈز کے تاریخی میدان پر کھیلا گیا میچ پاکستان کا 473 واں ٹیسٹ تھا۔ اس شکست کے ساتھ ہی قومی ٹیم کی مجموعی ناکامیوں کی تعداد 154 ہو گئی ہے، جبکہ فتوحات کی تعداد 153 پر ہی رک گئی۔
کرکٹ اعداد و شمار کے مطابق، 1987 کے بعد سے یہ پہلا موقع ہے کہ قومی ٹیم کا فتح و شکست کا تناسب اس حد تک متاثر ہوا ہے۔ کھیل کے طویل فارمیٹ میں حالیہ کچھ عرصے سے جاری بدترین فارم اور بے ربط کارکردگی اس تاریخ ساز تنزلی کی بنیادی وجہ بنی ہے۔