اسلام آباد (پاک ٹوڈے): وزیراعظم شہباز شریف نے پاکستان تحریک انصاف سے لانگ مارچ ختم کرنے کی اپیل کرتے ہوئے ایک بار پھر مذاکرات کی پیشکش کردی۔
اسلام آباد میں کشمیر چوک توسیعی منصوبے کے سنگ بنیاد کی تقریب سے خطاب کرتے ہوئے وزیراعظم نے کہا کہ پی ٹی آئی قیادت کے ساتھ بامقصد اور بامعنی مذاکرات کا فیصلہ کیا گیا تھا اور حکومت کو امید تھی کہ بات چیت کے مثبت نتائج سامنے آئیں گے، تاہم مذاکرات کامیاب نہ ہوسکے۔
شہباز شریف نے کہا کہ دھرنوں اور لانگ مارچ کا سلسلہ دوبارہ ملک کے سامنے آرہا ہے۔ ان کے مطابق حکومت نے بڑی محنت سے ملکی معیشت کو استحکام کی جانب گامزن کیا ہے اور اب ترقی کا وقت ہے۔
وزیراعظم نے کہا کہ اگر پی ٹی آئی لانگ مارچ ختم کردے تو حکومت اس کے ساتھ بات چیت کے لیے تیار ہے۔ انہوں نے کہا کہ عوام کے جان و مال کا تحفظ حکومت کی ذمہ داری ہے، جبکہ دھرنوں اور لانگ مارچ سے ملک کو نقصان ہوگا۔
واضح رہے کہ حکومت اور اپوزیشن کے درمیان مذاکرات کے کئی دور ہوئے تھے، تاہم 3 اکتوبر کو ہونے والا آخری دور بھی بغیر کسی نتیجے کے ختم ہوگیا تھا۔ دونوں جانب سے مذاکرات کی ناکامی کی ذمہ داری ایک دوسرے پر عائد کی گئی۔
