وزیراعظم شہباز شریف لندن پہنچ گئے، چند روز قیام کے بعد نیویارک روانہ ہوں گے۔

لندن (پاک ٹوڈے): وزیراعظم شہباز شریف لندن پہنچ گئے، ان کے خصوصی طیارے نے لوٹن ایئرپورٹ پر لینڈ کیا، جہاں پاکستان کے ہائی کمشنر ٹیپو عثمان اور سفارتی عملے نے ان کا استقبال کیا۔

دفتر خارجہ کے مطابق وزیراعظم شہباز شریف لندن میں چند روز قیام کریں گے، جس کے بعد وہ امریکا روانہ ہوں گے۔ وزیراعظم نیویارک میں اقوام متحدہ کی جنرل اسمبلی کے 81ویں اجلاس کے اعلیٰ سطحی اجلاس میں شرکت کریں گے اور پاکستانی وفد کی قیادت کریں گے۔

دفتر خارجہ کے مطابق وزیراعظم جنرل اسمبلی سے اپنے خطاب میں علاقائی اور عالمی صورتحال پر پاکستان کا مؤقف پیش کریں گے۔ وہ پائیدار ترقی، موسمیاتی تبدیلی، انسداد دہشت گردی، اسلاموفوبیا، عالمی معاشی چیلنجز، اقوام متحدہ میں اصلاحات اور عالمی جنوب کو درپیش مسائل سے متعلق پاکستان کی ترجیحات اجاگر کریں گے۔

وزیراعظم اپنے خطاب میں جموں و کشمیر اور فلسطین کی صورتحال کی جانب بھی عالمی برادری کی توجہ مبذول کرائیں گے۔

دورہ امریکا کے دوران وزیراعظم شہباز شریف اعلیٰ سطحی تقریبات میں شرکت کے علاوہ مختلف عالمی رہنماؤں اور اقوام متحدہ کے سیکریٹری جنرل سے دوطرفہ ملاقاتیں بھی کریں گے۔

ملاقاتوں میں پاکستان کے علاقائی امن، بین الاقوامی تعاون اور کثیرالجہتی نظام سے متعلق مؤقف کو اجاگر کیا جائے گا۔

دفتر خارجہ کے مطابق دورہ امریکا مکمل کرنے کے بعد وزیراعظم وطن واپسی کے سفر کے دوران دوبارہ لندن میں قیام کریں گے، جس کے بعد پاکستان روانہ ہوں گے۔