حمید سمسور
پاکستان کے وزیرِ دفاع خواجہ آصف نے ملک میں نئے صوبوں کے قیام کی حمایت کرتے ہوئے کہا ہے کہ اگر 12 صوبے بنانے کی تجویز ہو تو اس پر غور کیا جا سکتا ہے، تاہم نئے صوبے لسانی، نسلی یا سیاسی بنیادوں پر نہیں بننے چاہییں۔
خواجہ آصف نے مالی وسائل کی موجودہ تقسیم پر بھی تنقید کرتے ہوئے کہا کہ وفاق سے منتقل ہونے والے فنڈز صوبائی حکومتوں کے اختیار میں رہتے ہیں، حالانکہ ان وسائل کا اصل مقصد بلدیاتی اداروں کو مضبوط بنانا ہے۔ ان کا کہنا تھا کہ بلدیاتی حکومتیں اب بھی صوبائی حکام پر انحصار کرتی ہیں۔
پاکستان میں نئے صوبے بنانے کی بحث حال ہی میں وزیرِ داخلہ محسن نقوی کے بیان کے بعد شروع ہوئی تھی۔
بلوچستان میں نئے انتظامی یونٹ کے قیام کے حوالے سے ملے جلے رجحانات پائے جاتے ہیں۔
صوبے انتظامی نہیں بلکہ سیاسی یونٹس ہیں
نیشنل پارٹی کے سینیٹر جان محمد بلیدی نے کہا کہ پاکستان کی معاشی صورتحال سب کے سامنے ہے۔ چار صوبوں کو سنبھالنا ہی مشکل ہے، 12 صوبے بنانا تو بہت دور کی بات ہے۔
ان کا کہنا تھا کہ طاقتور حلقوں میں ایک سوچ رہی ہے کہ وہ پاکستان میں مضبوط قومی وحدتیں نہیں چاہتے بلکہ انتظامی بنیادوں پر نئے صوبے بنانا چاہتے ہیں، حالانکہ موجودہ صوبے ثقافتی، تاریخی اور جغرافیائی حیثیت رکھتے ہیں اور قیامِ پاکستان سے پہلے بھی موجود تھے۔ مقتدر حلقے انہیں پاکستان کے پارلیمانی جمہوری نظام میں بھی قبول نہیں کرتے۔ صوبوں کے قیام کی بحث چھیڑنے سے حالات مزید خراب ہوں گے۔ وفاقی حکومت صوبوں کو کمزور کرنے کے لیے ہمیشہ نئے حربے استعمال کرتی ہے۔
نئے انتظامی یونٹ کا مطالبہ کہاں سے آیا؟
بلوچستان نیشنل پارٹی کے نائب صدر ساجد ترین ایڈووکیٹ نے کہا کہ نئے انتظامی یونٹ کا مطالبہ سیاسی جماعتوں کو پارلیمنٹ میں اٹھانا چاہیے۔ یہ محض انتظامی یونٹ کا معاملہ نہیں بلکہ وسائل پر کنٹرول حاصل کرنے کی کوشش ہے، جس کے پیچھے اسٹیبلشمنٹ کارفرما ہے۔
ان کا کہنا تھا کہ سب سے پہلے وفاقی وزیرِ داخلہ نے انتظامی یونٹ کی بات کی، سب کو معلوم ہے کہ وہ کہاں کی نمائندگی کرتے ہیں، جبکہ وزیرِاعظم اس معاملے پر خاموش ہیں۔ پاکستان پیپلز پارٹی نے صوبوں کی تقسیم نہ کرنے کی قرارداد منظور کی ہے۔
انہوں نے کہا کہ یہ عوام کی نمائندہ نہیں بلکہ غیر منتخب حکومت ہے۔ گزشتہ 70 سال کے دوران پارلیمنٹ کو جو اختیارات دلائے گئے اور عدلیہ کو مضبوط بنانے کے لیے جو کوششیں کی گئیں، ان سب پر اس غیر قانونی حکومت کے ذریعے پانی پھر گیا ہے۔ یہ اقدامات عوام کے مفاد میں نہیں بلکہ سیاسی قوتوں کو تقسیم کرنے اور ان کے اثر و رسوخ کو کم کرنے کے لیے کیے جا رہے ہیں۔
کیا نئے انتظامی یونٹ بنانے کے لیے معاشی اور سکیورٹی حالات سازگار ہیں؟
جمعیت علمائے اسلام (ف) کے صوبائی سربراہ سینیٹر مولانا عبدالواسع نے کہا کہ وہ اصولی طور پر انتظامی بنیادوں پر نئے صوبوں کے مخالف نہیں، تاہم موجودہ معاشی بدحالی اور مخدوش سکیورٹی صورتحال نئے صوبوں کے قیام کے لیے موزوں نہیں۔ اس مقصد کے لیے سازگار ماحول کی ضرورت ہے۔
مبصرین کی رائے: سیاسی جماعتیں اپنے مفادات کو ترجیح دیتی ہیں
پاکستان پیپلز پارٹی سندھ کی تقسیم کی مخالف ہے، جبکہ پی ٹی آئی اور عوامی نیشنل پارٹی خیبرپختونخوا کی تقسیم کے خلاف قراردادیں منظور کر چکی ہیں۔ دوسری جانب یہی سیاسی جماعتیں جنوبی پنجاب کو الگ صوبہ بنانے کی حمایت کرتی ہیں، جبکہ ایم کیو ایم کراچی کو سندھ سے الگ کرنے کی کوشش کرتی رہی ہے۔
بعض قوم پرست سیاسی جماعتیں نئے انتظامی یونٹس کے قیام کو وسائل پر قبضے کی کوشش قرار دیتی ہیں۔ ان کا موقف ہے کہ قومی مالیاتی کمیشن (این ایف سی) آئین کے آرٹیکل 160 کے تحت صوبوں اور وفاقی حکومت کے درمیان ٹیکسوں سے حاصل ہونے والی آمدنی کی تقسیم کا آئینی طریقہ کار ہے۔
اٹھارویں آئینی ترمیم کے ذریعے صوبوں کے مالی وسائل کو قانونی تحفظ فراہم کیا گیا اور انہیں مزید اختیارات دیے گئے، جبکہ ساتویں این ایف سی ایوارڈ کے تحت مالی وسائل کی تقسیم کا تناسب طے کیا گیا۔ اس ایوارڈ کے تحت وفاقی حکومت کی ٹیکس آمدنی کا 57.5 فیصد صوبوں اور 42.5 فیصد وفاق کے حصے میں آتا ہے۔ اصل تنازع ان وسائل پر اختیار اور ان کے استعمال کا ہے۔
سیاسی جماعتوں کا یہ بھی کہنا ہے کہ اٹھارویں آئینی ترمیم کے بعد بلدیاتی انتخابات کرانا صوبوں کی ذمہ داری ہے، تاہم صوبائی حکومتیں اپنے سیاسی مفادات کے مطابق یہ انتخابات کراتی ہیں۔ جہاں ان کا فائدہ ہو وہاں بلدیاتی انتخابات کرائے جاتے ہیں اور جہاں مفاد نہ ہو وہاں یہ عمل مؤخر کر دیا جاتا ہے۔
بعض سیاسی تجزیہ کاروں کے مطابق دفاعی اخراجات، قرضوں کی ادائیگی اور دیگر مالی ذمہ داریوں کے باعث وفاق کو مالی مشکلات کا سامنا ہے، جبکہ این ایف سی ایوارڈ اور اٹھارویں آئینی ترمیم کے بعد وفاق اور صوبوں کے درمیان مالی و انتظامی اختیارات کے حوالے سے بھی پیچیدگیاں پیدا ہوئی ہیں۔
مبصرین کا خیال ہے کہ اس پہلو کو بھی دیکھنے کی ضرورت ہے کہ نئے انتظامی یونٹس کا قیام اٹھارویں آئینی ترمیم کے بعد وفاق اور صوبوں کے درمیان اختیارات کی ازسرِنو تقسیم کی کسی منصوبہ بندی کا حصہ تو نہیں۔
مبصرین کے مطابق پاکستان ایک جمہوری ملک ہے اور نئے صوبوں کے قیام یا آئینی ڈھانچے میں تبدیلی کے لیے پارلیمنٹ اور سیاسی جماعتوں کی رضامندی ضروری ہے۔
