کاں (پاک ٹوڈے): فرانس کے شمالی خطے نارمنڈی کے شہر ‘کاں’ (Caen) میں ایک سرپھرے ڈرائیور نے شاپنگ سینٹر کے باہر کھڑے ہجوم پر جان بوجھ کر گاڑی چڑھا دی، جس کے نتیجے میں 2 افغان شہری جاں بحق اور 9 افراد شدید زخمی ہو گئے۔
فرانسیسی حکام کے مطابق جاں بحق ہونے والے دونوں افراد کا تعلق افغانستان سے تھا، جن کی عمریں بالترتیب 28 اور 35 سال تھیں۔ واقعہ اس وقت پیش آیا جب ایک تیز رفتار گاڑی نے دکان کے باہر موجود شہریوں کو سیدھا نشانہ بنایا، جس سے علاقے میں بھگدڑ مچ گئی۔
پولیس نے کارروائی کرتے ہوئے واقعے کے مرکزی ملزم کو موقع پر ہی گرفتار کر لیا ہے۔ حکام کے مطابق گرفتار 26 سالہ ملزم کا تعلق چیچنیا (روس) سے ہے۔ پولیس نے ملزم کو تحویل میں لے کر واقعے کی وجوہات اور پسِ منظر کی تحقیقات شروع کر دی ہیں۔