ریاض (پاک ٹوڈے): سعودی عرب میں امریکی مشن نے 8 اکتوبر 2026 کو ریاض کے کنگ خالد انٹرنیشنل ایئرپورٹ پر حملوں کی اطلاعات کے بعد امریکی شہریوں کے لیے سکیورٹی الرٹ جاری کردیا ہے۔
امریکی مشن کے مطابق سعودی عرب اور حوثیوں کے درمیان کشیدگی کے باعث فوجی تنازع مزید شدت اختیار کرسکتا ہے۔ شہریوں کو ممکنہ پروازوں کی منسوخی، فضائی حدود کی بندش اور سفری مشکلات کے حوالے سے خبردار کیا گیا ہے۔
امریکی مشن نے شہریوں کو ہدایت کی ہے کہ وہ اپنی پروازوں کی روانگی سے متعلق معلومات متعلقہ ایئرلائن اور ہوائی اڈے سے براہ راست حاصل کریں۔ اس کے علاوہ امریکی شہریوں کو یمن کی سرحد کے قریب سفر نہ کرنے کا مشورہ دیا گیا ہے۔
الرٹ میں سعودی عرب میں مقیم امریکی شہریوں کو سعودی سول ڈیفنس کی جانب سے جاری کردہ قومی ہدایات پر عمل کرنے کی بھی تاکید کی گئی ہے۔
امریکی سرکاری ملازمین کے لیے سفری پابندیاں
امریکی مشن کے مطابق سعودی عرب میں تعینات امریکی سرکاری ملازمین کو ریاض کے کنگ خالد انٹرنیشنل ایئرپورٹ استعمال کرنے کے لیے خصوصی اجازت درکار ہوگی۔
مزید برآں، انہیں حفاظتی خدشات کے پیش نظر یمن کی سرحد سے 20 میل کے اندر سفر کرنے کی اجازت نہیں ہوگی۔ جیزان، عسیر اور نجران صوبوں کے علاوہ قطیف، ینبع اور طائف کے شہروں میں سفر کے لیے بھی خصوصی اجازت لینا ضروری قرار دیا گیا ہے۔