خضدار میں ماربل فیکٹری پر مسلح افراد کا حملہ، 18 مزدور اغوا

خضدار (پاک ٹوڈے): بلوچستان کے ضلع خضدار میں نامعلوم مسلح افراد نے ماربل فیکٹری پر حملہ کرکے 18 مزدوروں کو اغوا کر لیا، جبکہ فائرنگ کے نتیجے میں ایک مزدور زخمی ہوگیا۔

پولیس کے مطابق مسلح افراد فیکٹری میں کام کرنے والے مزدوروں کو اپنے ساتھ لے گئے۔ فائرنگ سے زخمی ہونے والے مزدور کو طبی امداد کے لیے قریبی اسپتال منتقل کر دیا گیا ہے۔

واقعے کی اطلاع ملتے ہی پولیس اور لیویز اہلکار موقع پر پہنچ گئے اور مغویوں کی بازیابی کے لیے علاقے میں سرچ آپریشن شروع کر دیا۔

پولیس کے مطابق واقعے کی تحقیقات جاری ہیں، جبکہ حملہ آوروں اور اغوا کے محرکات سے متعلق تاحال تفصیلات سامنے نہیں آئیں۔