کویت (پاک ٹوڈے): ایرانی فوج نے کویت میں امریکی افواج کے زیرِ استعمال علی السالم ایئر بیس پر ڈرون حملے کی تصدیق کرتے ہوئے دعویٰ کیا ہے کہ کارروائی میں امریکی فوجی تنصیبات، فضائی دفاعی نظام اور ڈرون و میزائل لانچرز کو نشانہ بنایا گیا۔
ایرانی فوج کے بدھ کی صبح جاری بیان کے مطابق اس کے جنگی ڈرونز نے علی السالم ایئر بیس پر حملہ کیا۔ بیان میں کہا گیا کہ ایران اپنی سلامتی کے دفاع میں کسی دباؤ کے سامنے نہیں جھکے گا اور کسی بھی خطرے یا جارحیت کا سخت جواب دیا جائے گا۔
اس سے قبل کویتی فوج نے اعلان کیا تھا کہ ملک کا فضائی دفاعی نظام حملہ آور ڈرونز اور میزائلوں کا مقابلہ کر رہا ہے۔ فوج کے مطابق مختلف علاقوں میں سنی جانے والی دھماکوں کی آوازیں فضائی دفاعی نظام کی جانب سے ڈرونز کو روکنے اور تباہ کرنے کی کارروائی کا نتیجہ ہو سکتی ہیں۔
دوسری جانب ایرانی پاسدارانِ انقلاب نے دعویٰ کیا ہے کہ بحرین میں امریکی افواج کے زیرِ استعمال شیخ عیسیٰ ایئر بیس کے ریڈار نظام کو بھی ڈرون حملے میں نشانہ بنایا گیا۔ بحرینی حکام کا کہنا ہے کہ ان کے فضائی دفاعی نظام نے حملہ آور اہداف کو روک کر تباہ کر دیا۔
