واشنگٹن (پاک ٹوڈے): امریکی ریاست مشی گن سے نومنتخب مسلمان سینیٹر عبدالسید نے اعلان کیا ہے کہ وہ 3 جنوری 2027 کو اپنے عہدے کا حلف قرآن پاک پر اٹھائیں گے۔ اس فیصلے کے بعد وہ امریکی تاریخ میں قرآن پاک پر حلف اٹھانے والے پہلے سینیٹر بن جائیں گے۔
امریکی نشریاتی ادارے کو انٹرویو دیتے ہوئے عبدالسید نے بتایا کہ وہ حلف برداری کی تقریب کے لیے قرآن پاک کے دو تاریخی نسخوں میں سے کسی ایک کا انتخاب کرنے پر غور کر رہے ہیں۔
ان میں پہلا نسخہ سابق امریکی صدر تھامس جیفرسن کا تاریخی قرآن ہے، جو امریکی کانگریس کی لائبریری میں محفوظ ہے۔ اسی نسخے پر 2007 میں امریکی ایوان نمائندگان کے پہلے مسلمان رکن کیتھ ایلیسن نے حلف اٹھایا تھا۔ دوسرا نسخہ یونیورسٹی آف مشی گن میں محفوظ ہے۔
عبدالسید کا کہنا تھا کہ ابھی یہ فیصلہ نہیں ہوا کہ حلف برداری کے موقع پر کون سا نسخہ استعمال کیا جائے گا، تاہم وہ قرآن پاک پر ہی حلف اٹھائیں گے۔
انہوں نے مذہبی آزادی اور امریکی آئین کا حوالہ دیتے ہوئے کہا کہ ہر شہری کو اپنے مذہب پر عمل کرنے اور اپنی مذہبی آزادی کے مطابق زندگی گزارنے کا حق حاصل ہے۔ ان کے مطابق حلف برداری میں اصل اہمیت کسی مخصوص مذہبی کتاب کی نہیں بلکہ امریکی آئین سے وفاداری اور اس کے تحفظ کے عہد کی ہے۔
واضح رہے کہ عبدالسید نے 3 نومبر 2026 کو ہونے والے امریکی انتخابات میں ریپبلکن امیدوار مائیک راجرز کو شکست دے کر کامیابی حاصل کی تھی۔ اس کامیابی کے ساتھ وہ امریکی سینیٹ کے پہلے مسلمان رکن منتخب ہوئے ہیں۔
امریکی آئین کے تحت کسی سرکاری عہدے کا حلف اٹھانے کے لیے بائبل یا کسی مخصوص مذہبی کتاب کا استعمال لازمی نہیں ہے، جبکہ آئین کی شق 6 مذہب کی بنیاد پر سرکاری عہدوں کے لیے اہلیت کی شرط عائد کرنے سے بھی روکتی ہے۔