کابل (پاک ٹوڈے): اقوام متحدہ کے امدادی مشن برائے افغانستان یوناما نے کہا ہے کہ افغانستان کے صوبوں کنڑ اور ہلمند میں آج ہونے والے فضائی حملوں میں کم از کم 10 شہری جاں بحق ہوئے، جن میں زیادہ تعداد بچوں کی ہے، جبکہ 9 افراد زخمی ہوئے۔
یوناما کے مطابق سرحد پار کشیدگی کے باعث عام شہری مسلسل متاثر ہو رہے ہیں۔ مشن نے فریقین پر زور دیا ہے کہ کشیدگی میں کمی کے لیے مذاکرات کا راستہ اختیار کیا جائے، بین الاقوامی قانون کا احترام کیا جائے اور مزید شہری نقصان کی روک تھام یقینی بنائی جائے۔
یوناما کی رپورٹ ایسے وقت سامنے آئی ہے جب افغان حکام نے حملوں میں رہائشی علاقوں کو نشانہ بنانے اور شہری ہلاکتوں کا دعویٰ کیا ہے، جبکہ پاکستان نے کارروائی کو مسلح عناصر کے ٹھکانوں کے خلاف قرار دیتے ہوئے شہری نقصان سے بچنے کے لیے احتیاطی اقدامات کیے جانے کا مؤقف اختیار کیا ہے۔
