کسی بھی خطرے یا حملے کا مؤثر جواب دینے میں ہچکچاہٹ نہیں کریں گے، محمد بن سلمان

ریاض (پاک ٹوڈے): سعودی عرب کے ولی عہد محمد بن سلمان نے کہا ہے کہ مملکت کو نقصان پہنچانے کی کوشش کرنے والے کسی بھی خطرے یا حملے کا مؤثر جواب دینے میں ہچکچاہٹ نہیں کی جائے گی۔

شوریٰ کونسل کے افتتاحی اجلاس سے خطاب کرتے ہوئے محمد بن سلمان نے کہا کہ سعودی عرب اپنی سلامتی اور مفادات کو نقصان پہنچانے والی کسی بھی کارروائی کا مؤثر انداز میں جواب دے گا۔

سعودی ولی عہد کے مطابق سعودی عرب، ترکی اور پاکستان کے درمیان مکہ دفاعی معاہدے کا مقصد خطے کو بڑھتے ہوئے تنازعات سے محفوظ رکھنا ہے۔ انہوں نے بتایا کہ مملکت نے بین الاقوامی آبی گزرگاہوں کے تحفظ کے لیے کثیر ملکی دفاعی بحری اتحاد کے قیام کا عمل بھی شروع کردیا ہے۔

محمد بن سلمان نے واضح کیا کہ بین الاقوامی آبی گزرگاہوں کو سیاسی یا معاشی دباؤ کے لیے استعمال کرنے کی کوششوں کو مسترد کیا جائے گا۔

سعودی ولی عہد نے فلسطینی علاقوں میں جاری اسرائیلی حملوں اور مقبوضہ مشرقی بیت المقدس میں مسجد اقصیٰ کی مسلسل خلاف ورزیوں کی بھی شدید مذمت کی۔

انہوں نے یمن کی بین الاقوامی طور پر تسلیم شدہ حکومت کی حمایت جاری رکھنے کے عزم کا اعادہ کرتے ہوئے کہا کہ اس کا مقصد پورے ملک میں حکومتی عمل داری قائم کرنا، استحکام بحال کرنا اور حوثیوں کے حملوں کا مقابلہ کرنا ہے۔

محمد بن سلمان نے حوثی گروپ پر ’’افراتفری اور تباہی‘‘ کا راستہ اختیار کرنے کا الزام بھی عائد کیا۔