ترکی (پاک ٹوڈے): ترکی کے صوبہ مانیسا کے شہر ترگوتلو میں ایک نوعمر طالب علم نے ہائی اسکول کے باہر فائرنگ کردی، جس کے نتیجے میں 11 طلبہ زخمی ہوگئے۔
واقعہ منگل کی صبح تقریباً 8 بجے پیش آیا۔ ترگوتلو مغربی ترکی کے شہر ازمیر کے قریب واقع ہے۔
علاقائی گورنر کے دفتر کے مطابق فائرنگ کے بعد پولیس نے فوری کارروائی کرتے ہوئے حملہ آور نابالغ کو گرفتار کرلیا اور اسے تفتیش کے لیے حراست میں لے لیا۔
ترکی کے وزیر انصاف اکین گورلیک نے ایکس پر جاری بیان میں بتایا کہ فائرنگ سے 11 طلبہ زخمی ہوئے، جن میں سے دو کی حالت سنگین ہے۔
وزیر انصاف کے مطابق حملہ آور کے والدین اور دادا کو بھی گرفتار کرلیا گیا ہے، جبکہ واقعے کی مزید تحقیقات جاری ہیں۔
فائرنگ کے بعد پولیس اور ریسکیو ٹیمیں اسکول پہنچ گئیں، جبکہ واقعے کی اطلاع ملنے پر گھبراہٹ زدہ والدین بھی اسکول کے باہر جمع ہوگئے۔
ترکی میں اسکول فائرنگ کے واقعات نسبتاً کم پیش آتے ہیں، تاہم رواں سال اپریل میں جنوبی ترکی میں مسلسل دو روز ایسے حملے ہوئے تھے، جن کے بعد عوامی سطح پر شدید ردعمل سامنے آیا تھا۔
