ایشین گیمز کرکٹ: نیپال کی افغانستان کے خلاف سنسنی خیز فتح، ہانگ کانگ کی عمان کو شکست

ٹوکیو (پاک ٹوڈے): ایشین گیمز کے کرکٹ ایونٹ میں نیپال کی قومی ٹیم نے شاندار کھیل کا مظاہرہ کرتے ہوئے افغانستان کو 5 وکٹوں سے شکست دے کر ٹورنامنٹ میں اہم پیش رفت حاصل کر لی ہے، جبکہ ایک اور میچ میں ہانگ کانگ نے عمان کو چت کر دیا۔

​تفصیلات کے مطابق گروپ ‘اے’ کے اہم مقابلے میں افغانستان کی ٹیم نیپال کی نپی تلی باؤلنگ کے سامنے مشکلات کا شکار دکھائی دی اور پہلے بیٹنگ کرتے ہوئے 7 وکٹوں کے نقصان پر صرف 102 رنز ہی بنا سکی۔

افغانستان کی جانب سے فیصل خان اور نجیب اللہ زدران 30، 30 رنز بنا کر نمایاں بیٹرز رہے۔

​نیپالی باؤلرز نے زبردست کارکردگی کا مظاہرہ کیا۔ کوشل بھرٹل نے مہلک باؤلنگ کرتے ہوئے 4 افغان کھلاڑیوں کو شکار کیا، جبکہ للت راج بنشی نے بھی ان کا بھرپور ساتھ دیتے ہوئے 3 وکٹیں حاصل کیں۔

​103 رنز کے ہدف کے تعاقب میں نیپالی ٹیم کا آغاز شدید مشکلات سے ہوا اور ابتدائی تین کھلاڑی جلد ہی پیویلین لوٹ گئے۔ تاہم، اس دباؤ کے لمحے میں سندیپ جورا اور روہت نے ذمہ دارانہ بیٹنگ کی اور ٹیم کو سنبھالا دیا۔

سندیپ جورا نے 34 رنز کی سنسنی خیز اننگز کھیلی جبکہ روہت نے 33 رنز کی ناقابلِ شکست باری کھیل کر ٹیم کی فتح یقینی بنائی۔ نیپال نے یہ ہدف 16 گیندیں قبل ہی 5 وکٹوں کے نقصان پر باآسانی حاصل کر لیا۔

دوسری جانب گروپ ‘بی’ کے میچ میں ہانگ کانگ نے عمان کو 41 رنز سے مات دی۔ ہانگ کانگ نے پہلے بیٹنگ کرتے ہوئے 8 وکٹوں پر 121 رنز بورڈ پر سجائے۔ جواب میں عمان کی بیٹنگ لائن ریت کی دیوار ثابت ہوئی اور ٹیم مقررہ اوورز میں 6 وکٹوں پر محض 80 رنز ہی بنا سکی۔