تہران (پاک ٹوڈے): ایران نے افغانستان اور پاکستان کے درمیان جاری کشیدگی اور جھڑپوں کے خاتمے پر زور دیتے ہوئے دونوں فریقوں سے تنازع پرامن طریقے سے حل کرنے کا مطالبہ کیا ہے۔
ایران کی قومی سلامتی کونسل کے سیکریٹری محسن رضائی نے ایرانی سرکاری میڈیا کو انٹرویو دیتے ہوئے کہا کہ ایران جنگ کا حامی نہیں اور طالبان و پاکستان کے درمیان جاری تنازع ختم ہونا چاہیے۔
محسن رضائی نے کہا کہ ایران جنگ مخالف ملک ہے اور جنگ کی حمایت نہیں کرتا۔ ان کے مطابق تنازعات کو پرامن طریقوں سے حل کیا جانا چاہیے۔
انہوں نے طالبان اور پاکستان کے درمیان کشیدگی کے حوالے سے مزید تفصیلات بیان نہیں کیں، تاہم ایران کی جانب سے اس سے قبل بھی دونوں فریقوں کو مذاکرات اور مفاہمت کے ذریعے مسائل حل کرنے کی دعوت دی جاتی رہی ہے۔
رپورٹ کے مطابق پاکستان اور طالبان کے درمیان تقریباً ایک سال سے کشیدگی میں اضافہ ہوا ہے اور پاکستان کی جانب سے افغانستان کے مختلف علاقوں میں فضائی کارروائیوں کے دعوے بھی سامنے آتے رہے ہیں۔
ایران نے اس معاملے پر فریقین کے درمیان بات چیت اور پرامن حل کی حمایت کی ہے جبکہ تہران کی جانب سے ثالثی کی پیشکش بھی کی جا چکی ہے۔
دوسری جانب ترکی، متحدہ عرب امارات، قطر اور چین بھی پاکستان اور طالبان کے درمیان کشیدگی کم کرنے اور مذاکرات کے لیے سفارتی کوششیں کر رہے ہیں۔
محسن رضائی نے یمن کے حوثیوں اور سعودی عرب کے درمیان تنازع کے حوالے سے بھی کہا کہ ایران جنگ کا خواہاں نہیں اور مسائل کو پرامن طریقے سے حل کرنے کی حمایت کرتا ہے۔
