ایشین گیمز ویمنز کرکٹ، سری لنکا نے پاکستان کو شکست دے کر فائنل میں جگہ بنا لی

نِشِن (پاک ٹوڈے): ایشین گیمز ویمنز کرکٹ کے پہلے سیمی فائنل میں سری لنکا نے پاکستان کو 8 وکٹوں سے شکست دے کر فائنل میں جگہ بنا لی۔

پاکستان ویمنز ٹیم نے پہلے بیٹنگ کرتے ہوئے مقررہ 20 اوورز میں 4 وکٹوں کے نقصان پر 177 رنز بنائے۔ عائشہ ظفر نے جارحانہ بیٹنگ کرتے ہوئے 40 گیندوں پر 71 رنز کی اننگز کھیلی، جس میں 9 چوکے اور 2 چھکے شامل تھے۔

شوال ذوالفقار نے 50 گیندوں پر 54 رنز بنائے، جبکہ کپتان فاطمہ ثنا نے 12 گیندوں پر 20 رنز کی اننگز کھیلی۔

177 رنز کے ہدف کے تعاقب میں سری لنکا نے شاندار بیٹنگ کا مظاہرہ کرتے ہوئے 17.5 اوورز میں صرف 2 وکٹوں کے نقصان پر ہدف حاصل کرلیا۔

سری لنکا کی کپتان چماری اتھاپتھو نے 50 گیندوں پر ناقابل شکست 83 رنز بنائے، ان کی اننگز میں 7 چوکے اور 6 چھکے شامل تھے۔ حسینی پریرا نے 26 گیندوں پر 42 رنز جبکہ ہرشیتھا سماراوکرما نے 20 رنز بنا کر ناٹ آؤٹ رہیں۔

پاکستان کی جانب سے فاطمہ ثنا اور نشرہ سندھو نے ایک، ایک وکٹ حاصل کی۔ سری لنکا نے 13 گیندیں قبل ہدف حاصل کرکے 8 وکٹوں سے کامیابی اپنے نام کی اور فائنل میں رسائی حاصل کرلی۔

ایشین گیمز ویمنز کرکٹ کے دوسرے سیمی فائنل میں دفاعی چیمپئن بھارت اور بنگلہ دیش کی ٹیمیں آج 20 ستمبر کو نِشِن، جاپان میں مدمقابل ہوں گی۔ بھارت نے کوارٹر فائنل میں میزبان جاپان کو 8 وکٹوں سے شکست دی تھی، جبکہ بنگلہ دیش چین کے خلاف کوارٹر فائنل بارش کے باعث منسوخ ہونے کے بعد بہتر آئی سی سی رینکنگ کی بنیاد پر سیمی فائنل میں پہنچا۔