افغانستان کے بدخشان میں طیارہ حادثے کا ذمہ دار قرار دیے گئے روسی پائلٹ پر مقدمہ چلانے کی تیاری

ماسکو (پاک ٹوڈے): افغانستان کے صوبہ بدخشان کے پہاڑی علاقے میں گر کر تباہ ہونے والے روسی نجی طیارے فالکن 10 کے پائلٹ کے خلاف تحقیقات مکمل ہونے کے بعد مقدمہ عدالت میں پیش کردیا گیا ہے۔

روسی میڈیا کے مطابق 44 سالہ پائلٹ دیمتری بلیاکوف پر پرواز کے حفاظتی ضوابط کی خلاف ورزی کا الزام عائد کیا گیا ہے۔ پائلٹ نے الزام تسلیم کرتے ہوئے تحقیقات میں تعاون بھی کیا ہے۔

یہ طیارہ 30 دسمبر 2024 کو تھائی لینڈ سے ماسکو جا رہا تھا کہ بدخشان کے پہاڑی علاقے میں گر کر تباہ ہوگیا۔ حادثے میں روسی تاجر اناتولی یفسیوکوف اور ان کی اہلیہ انا ہلاک ہوگئے تھے، جبکہ طیارے میں سوار دیگر چار افراد زندہ بچ گئے تھے۔

روسی تفتیش کاروں کے مطابق شدید مخالف ہواؤں اور ایندھن کم ہونے کے خطرے کے باوجود پائلٹ نے ہنگامی لینڈنگ کا فیصلہ نہیں کیا اور پرواز جاری رکھی۔ نتیجتاً طیارے کا ایندھن مکمل طور پر ختم ہوگیا اور دونوں انجن بند ہوگئے، جس کے بعد طیارہ گر کر تباہ ہوا۔

تحقیقات میں یہ بات بھی سامنے آئی ہے کہ پائلٹوں نے ایک امریکی کمپنی میں تربیت سے متعلق مبینہ جعلی دستاویزات کی بنیاد پر اپنے پرواز کے لائسنس حاصل کیے تھے۔

روسی حکام نے طیارے کے تباہ ہونے سے ہونے والے مالی نقصان کا تخمینہ تقریباً 5 لاکھ 72 ہزار ڈالر لگایا ہے۔ امکان ظاہر کیا جا رہا ہے کہ پائلٹ کو یہ رقم بھی ادا کرنے کا پابند کیا جا سکتا ہے۔