ٹانک (پاک ٹوڈے): ٹانک شہر کے علاقے وزیرآباد میں شہزادہ مارکیٹ کے قریب نامعلوم مسلح افراد نے ٹریفک پولیس کی گاڑی پر فائرنگ کر دی، جس کے نتیجے میں 3 پولیس اہلکار جان سے ہاتھ دو بیٹھے جبکہ متعدد افراد زخمی ہو گئے۔
پولیس کے مطابق نامعلوم مسلح افراد نے وزیرآباد کے علاقے میں ٹریفک پولیس کی گاڑی کو نشانہ بنایا۔ فائرنگ کے بعد حملہ آور موقع سے فرار ہو گئے اور پولیس کی گاڑی بھی اپنے ساتھ لے گئے، جبکہ ٹریفک پولیس انچارج عصمت اللہ کے بارے میں تاحال معلومات نہیں مل سکیں۔
مارے جانے والے اہلکاروں کی لاشیں اور زخمیوں کو ڈی ایچ کیو اسپتال ٹانک منتقل کر دیا گیا ہے۔ زخمیوں میں 2 شہری بھی شامل ہیں۔
واقعے کے بعد پولیس نے علاقے کو گھیرے میں لے کر حملہ آوروں کی تلاش اور گرفتاری کے لیے کارروائی شروع کر دی ہے۔ واقعے کی مزید تفصیلات اور حملے کی نوعیت کے بارے میں پولیس کی جانب سے مزید معلومات کا انتظار ہے۔
