غزہ (پاک ٹوڈے): وسطی غزہ میں اسرائیلی فوج کی جانب سے نئے فوجی آپریشن کے اعلان کے بعد سیکڑوں فلسطینی خاندانوں کو اپنے گھر بار چھوڑنے پر مجبور ہونا پڑ رہا ہے۔
اسرائیلی فوج نے بریج اور نصیرات پناہ گزین کیمپوں کے قریب نام نہاد ’یلو لائن‘ کے اطراف تین مخصوص علاقوں میں فوجی کارروائی کا اعلان کرتے ہوئے فلسطینی شہریوں کو وہاں سے نقل مکانی کی ہدایت جاری کی ہے۔
10 اکتوبر کو جنگ بندی نافذ ہونے کے بعد یہ پہلا موقع ہے کہ اسرائیل نے باقاعدہ فوجی آپریشن کے اعلان کے ساتھ فلسطینیوں کو انخلا کے احکامات دیے ہیں۔ تاہم جنگ بندی کے دوران بھی غزہ میں اسرائیلی بمباری اور حملوں کا سلسلہ جاری رہا ہے۔
نئے فوجی آپریشن کے باعث سیکڑوں فلسطینی خاندان ایک بار پھر اپنے گھروں سے بے دخل ہونے، خوف اور غیر یقینی صورت حال کا سامنا کرنے پر مجبور ہیں۔
