اسلام آباد (پاک ٹوڈے): جمعیت علمائے اسلام (جے یو آئی) نے سربراہ مولانا فضل الرحمان کی اسمبلی فلور پر تقریر بلیک آؤٹ کرنے پر شدید ردعمل کا اظہار کرتے ہوئے اسے عوام، پارلیمنٹ، جمہوریت اور آزادیٔ اظہار کی توہین قرار دیا ہے۔
جے یو آئی کے ترجمان اسلم غوری نے کہا کہ پارلیمنٹ کو ڈمی بنا دیا گیا ہے اور جمہوری حکومت آمریت کی تابع بن چکی ہے۔ انہوں نے سوال اٹھایا کہ اسمبلی میں تقریر پر پابندی، انتخابات میں دھاندلی اور انتخابی مہم کے دوران دھمکی آمیز خطوط جیسے معاملات کے ذریعے ملک کو کس سمت لے جایا جا رہا ہے۔
اسلم غوری نے کہا کہ آئین، پارلیمنٹ، آزادی اور جمہوریت کو بے توقیر کیا جا رہا ہے۔ ان کے بقول، پارلیمنٹ کی بالادستی کے نعرے لگانے والوں نے خود پارلیمنٹ کو مذاق بنا دیا ہے۔ انہوں نے خبردار کیا کہ جے یو آئی کو سیاسی طور پر دیوار سے لگانے کی کوشش کرنے والے نتائج کو نظرانداز نہ کریں۔
ترجمان جے یو آئی نے مزید کہا کہ انگریز کے تسلط کو تسلیم نہ کرنے والی جماعت اپنے بقول، کسی کے سیاسی تسلط کو بھی قبول نہیں کرے گی۔ انہوں نے حکمرانوں پر جمہوری روایات اور اقدار کو نقصان پہنچانے کا الزام بھی عائد کیا۔
