ملتان میں ڈکیتی کے دوران خاتون سے مبینہ زیادتی، تین نامعلوم ملزمان کے خلاف مقدمہ درج

ملتان (پاک ٹوڈے): ملتان میں موٹر وے پل کے قریب مسلح ملزمان نے ایک خاندان کو روک کر لوٹ لیا اور دورانِ واردات شہری کی اہلیہ سے مبینہ جنسی زیادتی کی۔ پولیس نے متاثرہ خاتون کے شوہر سعد سہیل کی مدعیت میں تین نامعلوم ملزمان کے خلاف مقدمہ درج کرکے تلاش شروع کردی ہے۔

مقدمے کے متن کے مطابق سعد سہیل اپنی اہلیہ اور دو بچوں کے ہمراہ سالگرہ کی تقریب میں شرکت کے بعد موٹر سائیکل پر واپس جا رہا تھا کہ واں چھتہ موٹر وے پل کے قریب تین مسلح افراد نے انہیں روک لیا۔ ملزمان نے شہری سے 1,700 روپے چھین لیے، جبکہ دو ملزمان نے اسے اور بچوں کو اسلحے کے زور پر یرغمال بنائے رکھا۔ شہری کے بیان کے مطابق تیسرے ملزم نے اس کی اہلیہ کو سڑک سے نیچے درختوں کی جانب لے جا کر مبینہ زیادتی کا نشانہ بنایا۔

واقعے کی اطلاع ملتے ہی سی پی او ملتان، خصوصی پولیس ٹیم، کرائم ریکارڈ آفس اور کرائم سین یونٹ کے اہلکار جائے وقوعہ پر پہنچے اور شواہد اکٹھے کیے۔

پولیس کے مطابق متاثرہ خاتون کا طبی معائنہ مکمل کرلیا گیا ہے اور نمونے تجزیے کے لیے پنجاب فرانزک سائنس ایجنسی بھجوا دیے گئے ہیں۔ ملزمان کی شناخت اور گرفتاری کے لیے کارروائی جاری ہے۔