کابل (پاک ٹوڈے): انٹرنیشنل کمیٹی آف ریڈ کراس کی ڈائریکٹر آف آپریشنز جاسمین پیریز ڈیسیمارز نے انتباہ جاری کیا ہے کہ شدید انسانی ضروریات کے باوجود افغانستان تدریجی طور پر عالمی برادری کی توجہ کا مرکز نہیں رہا۔
امریکی میڈیا اور فرانسیسی خبر رساں ادارے (AFP) کو کابل میں دیے گئے ایک انٹرویو کے دوران جاسمین ڈیسیمارز نے بتایا کہ افغانستان کے عوام اس وقت بقا کی شدید ترین مشکلات سے نبرد آزما ہیں۔ انہوں نے بین الاقوامی برادری پر زور دیا کہ وہ افغان عوام کی تکالیف کو فراموش نہ کرے اور انسانی بنیادوں پر امداد کی فراہمی جاری رکھے۔
آئی سی آر سی کی ڈائریکٹر نے تشویشناک انکشاف کرتے ہوئے بتایا کہ بین الاقوامی امداد میں مسلسل کمی کے نتیجے میں ملک بھر میں شدید غذائی قلت کے شکار بچوں کے علاج کے لیے قائم 100 مخصوص صحت کے مراکز بند کر دیے گئے ہیں، جس کے باعث ہزاروں معصوم بچوں کی زندگیوں کو شدید خطرات لاحق ہو گئے ہیں۔
عالمی امدادی تنظیموں نے خبردار کیا ہے کہ اگر فوری مالی و انسانی امداد بحال نہ کی گئی تو افغانستان میں جاری انسانی بحران مزید ہلاکت خیز صورتحال اختیار کر سکتا ہے۔