کراچی (پاک ٹوڈے): سہراب گوٹھ کے علاقے میں مسلح افراد کی جانب سے گاڑی پر فائرنگ کے نتیجے میں نجی نیوز ویب سائٹ سے وابستہ پروڈیوسر عمران گوگن جاں بحق ہو گئے۔ پولیس نے ابتدائی شواہد کی روشنی میں واقعے کو ٹارگٹ کلنگ قرار دے کر تحقیقات کا آغاز کر دیا ہے۔
افسوسناک واقعہ ایوب گوٹھ میں سادات دسترخوان کے قریب اس وقت پیش آیا جب عمران گوگن سہراب گوٹھ کے راستے نیو کراچی کی طرف جا رہے تھے۔ اسی اثنا میں موٹر سائیکل پر سوار نامعلوم افراد نے ان کی گاڑی کو نشانہ بناتے ہوئے اندھا دھند فائرنگ کر دی، جس کے نتیجے میں عمران گوگن کی گردن پر شدید گولی لگی۔
واقعے کے فوری بعد ریسکیو حکام نے انتہائی تشویشناک حالت میں زخمی کو نزدیک ترین اسپتال منتقل کیا، تاہم وہ زخموں کی تاب نہ لاتے ہوئے دم توڑ گئے۔ پولیس حکام کے مطابق مقتول کی شناخت ان کی جیب سے برآمد ہونے والے شناختی کارڈ کے ذریعے عمران گوگن کے نام سے ہوئی ہے۔
پولیس کا کہنا ہے کہ جائے وقوعہ سے تکنیکی و کرائم سین شواہد اکٹھے کر لیے گئے ہیں۔ بظاہر یہ واقعہ ہدف بنا کر قتل کرنے کا معلوم ہوتا ہے، تاہم تمام زاویوں سے چھان بین جاری ہے اور ملزمان کی گرفتاری کے لیے شہر کے مختلف حصوں میں چھاپے مارے جا رہے ہیں۔
