کوئٹہ (پاک ٹوڈے): زیارت کراس کے قریب واقع گرکی پولیس اسٹیشن اور کسٹمز آفس پر مسلح عسکریت پسندوں کے ایک بڑے حملے میں شدید تباہی اور جانی و مالی نقصان کی اطلاعات سامنے آئی ہیں۔
مقامی ذرائع کے مطابق عسکریت پسندوں نے پہلے عمارت کا گھیراؤ کیا اور شدید فائرنگ کے بعد پولیس و کسٹمز کی عمارت کو بارودی مواد سے دھماکہ کر کے تباہ کر دیا۔ ذرائع کے مطابق حملے اور دھماکے کے نتیجے میں متعدد افراد کی ہلاکت کی اطلاعات ہیں جبکہ سیکیورٹی فورسز اور کسٹمز کی درجنوں گاڑیوں کو آگ لگا کر خاکستر کر دیا گیا ہے۔
منظر عام پر آنے والی ویڈیو فوٹیج میں کسٹمز آفس کے احاطے میں کھڑی درجنوں گاڑیوں کو شعلوں کی لپیٹ میں دیکھا جا سکتا ہے۔ مقامی رپورٹس کے مطابق علاقے میں فائرنگ اور جھڑپوں کی شدت میں اب کچھ کمی آئی ہے جبکہ عسکریت پسند عمارت کے باقی ماندہ ڈھانچے کو مکمل طور پر تباہ کرنے کی کوشش کر رہے ہیں۔
واقعے کے بعد سیکیورٹی فورسز کی مزید نفری علاقے کی طرف روانہ کر دی گئی ہے، تاہم شدت پسند کارروائی مکمل کرکے روانہ ہوگئے۔