پشاور (پاک ٹوڈے): سہیل آفریدی نے سیاسی مخالفین پر سخت تنقید کرتے ہوئے کہا ہے کہ وہ ہمیشہ اپنے عوام اور جان بحق ہونے والے خاندانوں کے ساتھ شانہ بشانہ کھڑے رہے ہیں، اس لیے کسی کو انہیں عوام میں رہنے کا طریقہ سکھانے کی ضرورت نہیں ہے۔
تفصیلات کے مطابق پشاور میں بیان دیتے ہوئے انہوں نے کہا کہ وہ مسلسل اپنے لوگوں کے رابطے میں ہیں اور خیبر پختونخوا کے مختلف اضلاع کا دورہ کر رہے ہیں۔ ان کا کہنا تھا کہ "میں کبھی بنوں میں اپنے جاں بحق ہونے والے لواحقین کے پاس ہوتا ہوں، تو کبھی ہنگو، کوہاٹ، دیر اور سوات میں عوام کے درمیان موجود ہوتا ہوں۔”
انہوں نے مخالفین کو آڑے ہاتھوں لیتے ہوئے سوال اٹھایا کہ "یہ لوگ مجھے سکھائیں گے کہ اپنے لوگوں کے ساتھ کیسے کھڑا ہوا جاتا ہے یا عوام کا اصل مقصد کیا ہوتا ہے؟”
سہیل آفریدی نے مزید کہا کہ مخالف عناصر کی تاریخ گواہ ہے کہ وہ کبھی بھی پاکستان کے ساتھ مخلص نہیں رہے اور انہوں نے ہمیشہ قومی مفاد کو پسِ پشت ڈال کر اپنے ذاتی اور سیاسی مفادات کو ترجیح دی ہے۔ انہوں نے واضح کیا کہ عوام اب شعور رکھتے ہیں اور وہ جانتے ہیں کہ کون ان کا سچا ہمدرد ہے اور کون صرف اقتدار کی سیاست کر رہا ہے۔
