کوئٹہ (پاک ٹوڈے): بلوچستان ہائیکورٹ نے کوئٹہ میں زیرِ تعلیم 16 افغان میڈیکل طلبہ کو اپنی تعلیم جاری رکھنے کی اجازت دے دی ہے۔
طلبہ کے وکیل سید نذیر احمد آغا کے مطابق عدالت نے ان طلبہ کو 24 نومبر 2026 تک تعلیم جاری رکھنے کی اجازت دی ہے، جبکہ مقدمے کا حتمی فیصلہ آنے تک انہیں عارضی قانونی تحفظ بھی فراہم کیا گیا ہے۔ کیس کی اگلی سماعت 25 نومبر 2026 کو ہوگی۔
سید نذیر احمد آغا نے کہا کہ وہ پاکستان کے قانون کے مطابق افغان طلبہ کے ساتھ برتاؤ یقینی بنانے اور ان کی آواز متعلقہ حکام تک پہنچانے کے لیے کوششیں جاری رکھیں گے۔
دوسری جانب پاکستان میں زیرِ تعلیم افغان میڈیکل طلبہ نے اپنے تعلیمی ویزوں میں توسیع اور ڈگریاں مکمل کرنے کی اجازت دینے کا مطالبہ کیا ہے۔
رپورٹ کے مطابق پاکستان کی کونسل برائے طب و دندان سازی کے فیصلے کے بعد 31 جولائی 2026 کو افغان میڈیکل طلبہ کی واپسی کا عمل شروع کیا گیا تھا۔ اس کے بعد پنجاب، سندھ اور خیبرپختونخوا کی ہائیکورٹس نے مختلف مقدمات میں عبوری احکامات جاری کرتے ہوئے بعض افغان طلبہ کو تعلیم جاری رکھنے کی اجازت دی تھی۔