احمد آباد (پاک ٹوڈے): بھارتی ریاست گجرات کے شہر احمد آباد میں واقع معروف ‘آنند نکیتن اسکول’ کی لائبریری میں ملالہ یوسف زئی کی خود نوشت "آئی ایم ملالہ” (I Am Malala) کی موجودگی پر تنازع کھڑا ہو گیا۔ شدید اعتراضات کے بعد اسکول انتظامیہ پر 10,000 روپے کا جرمانہ عائد کر دیا گیا ہے۔
تفصیلات کے مطابق بعض مقامی افراد اور والدین کی جانب سے اسکول کی لائبریری میں موجود تعلیمی مواد اور کتب پر سخت سوالات اٹھائے گئے تھے، جس کے بعد معاملے کی باضابطہ تحقیقات کی گئیں۔ تحقیقاتی عمل اور تنازع کے دوران اسکول میں طلبہ کے لیے پڑھائے جانے والے اور دستیاب مواد کی وضاحتیں طلب کی گئیں۔
مزید برآں، اس تنازع کے دوران اسکول میں کروائی جانے والی روزمرہ کی دعا کے طریقہ کار اور کچھ دیگر طریقہ ہائے کار پر بھی اعتراضات اٹھائے گئے، جس کے بعد انتظامیہ نے نصابی و غیر نصابی مواد کی مکمل چھان بین اور وضاحت کا سلسلہ شروع کر دیا ہے۔
