کیلیفورنیا (پاک ٹوڈے): معروف سوشل میڈیا پلیٹ فارم انسٹاگرام نے ایک دہائی سے زائد عرصے کے بعد اپنے بنیادی ورڈ مارک اور لوگو کے ڈیزائن میں تبدیلی کر دی ہے، تاہم اس نئے انداز کو صارفین کی جانب سے شدید تنقید کا سامنا کرنا پڑ رہا ہے۔
کمپنی کی جانب سے پرانے ورڈ مارک کی جگہ زیادہ گول اور جدید ڈیزائن متعارف کرایا گیا ہے۔ انسٹاگرام کے سربراہ ایڈم موسیری کے مطابق 10 سال سے زیادہ پرانا ڈیزائن وقت کے ساتھ پرانا محسوس ہونے لگا تھا، اس لیے ایپ کی بصری شناخت کو زیادہ جدید اور واضح بنانے کے لیے یہ قدم اٹھایا گیا ہے۔
دوسری جانب سوشل میڈیا صارفین نے اس تبدیلی کو ناپسند کرتے ہوئے نشاندہی کی ہے کہ نئے فونٹ کے باعث حروف کی شکل ایسی ہو گئی ہے کہ لوگ ‘Instagram’ کو ‘Instagzam’ پڑھ رہے ہیں۔ صارفین کا کہنا ہے کہ یوں محسوس ہوتا ہے جیسے کمپنی نے اپنے نام میں ‘Z’ شامل کر لیا ہو، جس کے بعد آن لائن پلیٹ فارمز پر اس نئے ڈیزائن پر شدید بحث اور طنزیہ تبصروں کا سلسلہ جاری ہے۔
