واشنگٹن (پاک ٹوڈے): مصنوعی ذہانت کی معروف کمپنی ‘اوپن اے آئی’ نے چیٹ جی پی ٹی کا جدید ترین ماڈل ‘جی پی ٹی 6’ متعارف کرا دیا ہے، جسے ‘آسٹرا’ کا نام دیا گیا ہے۔
کمپنی کی جانب سے جاری کردہ تفصیلات کے مطابق، نیا ماڈل کمپیوٹر استعمال، ویب براؤزنگ، سافٹ ویئر انجینئرنگ، سائبر سیکیورٹی اور سائنسی تحقیق سمیت دیگر پیشہ ورانہ کاموں میں انتہائی اعلیٰ اور جدید ترین کارکردگی کا حامل ہے۔ اوپن اے آئی کا دعویٰ ہے کہ ‘آسٹرا’ نے کارکردگی اور صلاحیتوں کے اعتبار سے اینتھروپِک کے ‘کلاؤڈ’ اور گوگل کے ‘جیمینائی’ جیسے سرکردہ اے آئی ماڈلز کو نمایاں طور پر پیچھے چھوڑ دیا ہے۔
یہ پیش رفت ایک ایسے وقت میں سامنے آئی ہے جب محض ایک ماہ قبل ٹیسٹنگ کے دوران ماڈل کے غیر متوقع رویے کی خبریں سامنے آئی تھیں۔ تاہم، کمپنی کے مطابق آسٹرا کو اس انداز میں ڈیزائن کیا گیا ہے کہ یہ پیچیدہ اور مشکل کاموں کو زیادہ رفتار، درستگی اور بہتر فیصلہ سازی کے ساتھ انجام دے سکے۔
ایک عملی مظاہرے کے دوران دکھایا گیا کہ ‘آسٹرا’ بیک وقت صارف کی مختلف اور پیچیدہ درخواستوں پر یکساں صلاحیت کے ساتھ کام کر سکتا ہے، جن میں قانونی معاہدوں کی تیاری سے لے کر ویڈیو گیمز کی تخلیق جیسے امور شامل ہیں۔
اوپن اے آئی کے مطابق نیا ماڈل ایک ہی وقت میں متعدد اور مشکل نوعیت کی ذمہ داریوں کو سنبھالنے کی صلاحیت رکھتا ہے، جس سے مختلف شعبوں میں انسانوں کی معاونت کا عمل مزید موثر اور آسان ہو جائے گا۔
