کامران مرتضیٰ کا خواجہ آصف کو جواب، ’’یہ بیچارے نوکر حضرات ہیں، نوکری پکی کرنی ہوتی ہے‘‘

اسلام آباد (پاک ٹوڈے): جمعیت علمائے اسلام (ف) کے رہنما سینیٹر کامران مرتضیٰ نے وزیر دفاع خواجہ آصف کی مولانا فضل الرحمان پر تنقید کا جواب دیتے ہوئے کہا ہے کہ خواجہ آصف جیسے لوگ آتے جاتے رہتے ہیں، جبکہ وہ خود بھی ماضی میں فوج کے حوالے سے باتیں کرتے رہے ہیں۔

میڈیا سے گفتگو کرتے ہوئے کامران مرتضیٰ نے کہا کہ ان کی جماعت اداروں کے خلاف بات نہیں کرتی اور وہ فوج کا احترام کرتے ہیں۔ ان کے مطابق بعض باتیں محاورے کے طور پر کہی جاتی ہیں، لیکن انہیں بڑھا چڑھا کر پیش کیا جاتا ہے۔ انہوں نے خواجہ آصف پر تنقید کرتے ہوئے کہا کہ بعض لوگوں کو اپنی نوکری پکی کرنی ہوتی ہے۔

دوسری جانب جے یو آئی (ف) کی رکن قومی اسمبلی عالیہ کامران نے بھی خواجہ آصف کے بیان پر ردعمل دیتے ہوئے کہا کہ انہیں مولانا فضل الرحمان سے گلہ ہے کہ انہوں نے حکومتی اتحاد پر یقین کیوں کیا۔

عالیہ کامران نے کہا کہ خواجہ آصف کو مولانا فضل الرحمان کی تقریر کے دوران ہی جواب دینا چاہیے تھا۔ ان کے مطابق پارلیمانی روایات کا تقاضا ہے کہ کسی غیر موجود رکن کے بارے میں بات کرنے سے گریز کیا جائے۔

انہوں نے حکومت پر آئین اور پارلیمانی روایات کی خلاف ورزی کے الزامات عائد کرتے ہوئے کہا کہ ان کی جماعت ہمیشہ آئین کی بالادستی کی بات کرتی رہی ہے اور عمران خان و پاکستان تحریک انصاف کے معاملے پر بھی آئینی اصولوں کا ساتھ دے رہی ہے۔