شانگلہ (پاک ٹوڈے): وفاقی وزیر برائے امور کشمیر انجینئر امیر مقام نے دعویٰ کیا ہے کہ پاکستان تحریک انصاف (پی ٹی آئی) کی سیاست دفن ہو چکی ہے اور خیبر پختونخوا میں اس کی حکومت کے خاتمے پر کوئی بھی احتجاج کے لیے باہر نہیں نکلا۔
شانگلہ میں جلسے سے خطاب کرتے ہوئے امیر مقام نے کہا کہ صوبے کے عوام نے انتشار کی سیاست کرنے والوں کو مسترد کر دیا ہے۔ ان کے بقول خیبر پختونخوا سے لوٹ مار اور کرپشن کا خاتمہ ہو چکا ہے۔
وفاقی وزیر نے سابق وزیراعلیٰ پر تنقید کرتے ہوئے کہا کہ انہوں نے صرف جھوٹ بولا اور عوامی فلاح کے لیے کوئی واضح ایجنڈا پیش نہیں کیا۔ ان کا کہنا تھا کہ پی ٹی آئی کے 13 سالہ دورِ حکومت کے خاتمے پر صوبے کے عوام نے سکھ کا سانس لیا۔
امیر مقام نے کہا کہ مبینہ طور پر لوٹے گئے ایک ایک پیسے کا حساب لیا جائے گا۔ انہوں نے مزید کہا کہ خیبر پختونخوا کے عوام اب پی ٹی آئی کے ایجنڈے کو سمجھ چکے ہیں۔
